27.06.2019 / 14:34

Сумныя лічбы: параўналі бюджэты і колькасць турыстаў на Еўрапейскіх гульнях у Мінску і Баку 9

540 мільёнаў рублёў — столькі Беларусь ужо патраціла на правядзенне Еўрапейскіх гульняў. 266 мільёнаў з гэтай сумы — бюджэтныя грошы. Параўналі, у колькі абышліся першыя гульні Азербайджану і ці шмат турыстаў прыехалі паглядзець на спаборніцтвы (спойлер: няшмат, але да нас прыляцела яшчэ менш).

Бюджэт: танна не атрымалася

Афіцыйны бюджэт Еўрапейскіх гульняў у Баку склаў $1,12 мільярда. На арганізацыі не эканомілі — адно толькі выступленне Лэдзі Гагі на цэрымоніі адкрыцця каштавала $2 мільёны. А само шоу — $95 мільёнаў.

У Мінску ж на цырымоніі адкрыцця і закрыцця збіраюцца аддаць $12 мільёнаў. Але і хэдлайнеры — Ганна Нятрэбка і Мікалай Баскаў — не таго ўзроўню.

Па падліках ВВС, Азербайджан патраціў на гульні куды больш за афіцыйную лічбу — каля $5 мільярдаў. Бо сродкі на падрыхтоўку выдаткоўваліся з бюджэту не толькі ў год правядзення спаборніцтваў, але ў 2013-м і 2014-м. За іх кошт, у прыватнасці, пабудавалі Палац водных відаў спорту, гімнастычны комплекс, футбольны стадыён на 65 тысяч гледачоў, парк Еўрапейскіх гульняў у Баку, алімпійскія спартыўныя комплексы ў 11 рэгіёнах краіны і «дамы моладзі» ў 9 рэгіёнах.

У Беларусі неабходная спартыўная інфраструктура збольшага была. З таго, што дадаткова зрабілі, — правялі рэканструкцыю некаторых арэнаў, пабудавалі сталовую для спартоўцаў у Студэнцкай вёсцы, а ў самой вёсцы адрамантавалі пакоі, каб замест навучэнцаў засяліць туды атлетаў. Праўда, шмат грошай пацягнула «інфармацыйна-тэхналагічная платформа». На запуск афіцыйнага сайта гульняў, пракладку оптавалакна і іншыя ІТ-складнікі пайшло $37 мільёнаў.

Адзначым, што ў 2016 годзе Лукашэнка заяўляў, што агулам на падрыхтоўку да гульняў не патрацяць больш за $50 мільёнаў. «Гэта слёзы для краіны», — пракаментаваў ён тады гэту суму.

Турыстаў — у 4 разы менш, чым чакалася

За час Еўрапейскіх гульняў Баку наведала 28 тысяч турыстаў. У Беларусі, узяўшы за арыенцір гэту лічбу, чакалі не менш за 30 тысяч замежных гасцей.

«Гэта лічба з вельмі вялікай агаворкай, паколькі Баку быў далёка, палёты туды былі дастаткова дарагімі. У нашым выпадку чакаецца нашмат больш турыстаў», — запэўніваў намеснік дырэктара Дырэкцыі Еўрапейскіх гульняў Анатоль Котаў.

Пакуль прыехала толькі 8 тысяч. Цырымонія закрыцця гульняў ужо ў гэту нядзелю, таму малаверагодна, што колькасць турыстаў наблізіцца да жаданай.

Для параўнання, калі ў Мінску ў 2014 годзе праходзіў чэмпіянат свету па хакеі, краіну наведала каля 80 тысяч турыстаў.

Спартоўцаў таксама стала менш

Новы фармат, відаць, пакуль не надта цікавы і самім спартоўцам. Калі гульні ў Баку сабралі 5,7 тысячы атлетаў, то ў Мінск вырашыла прыехаць значна менш — 4 тысячы. На першых гульнях спартоўцы спаборнічалі ў 30 відах спорту, на сёлетніх — у 15.

Цікава, што ў 2015 годзе зборная Азербайджана была другой у медальным заліку. Беларусь пакуль таксама трымаецца на другім радку рэйтынгу. Першынство і тады, і цяпер — за Расіяй.

НЛ

2
Мордехай В. / Адказаць
27.06.2019 / 15:01
Залiваецца песнямi паўнюткi стадыён. Тысячы гледачоў  разявiўшы рты ды пiва стаяць на плошчы, не адрываючы вочы ад манiтора. Перапоўненыя бары на Зыбiцкай сочаць за трансляцыяй... Букмекеры ўвесь час мяняюць каэфiцыенты, падлiчваючы мiльёны на коне. Каментары равуць, захлёбваючыся ды размазваючы слюнi па ложы для прэсы! Аналiтыкi ды былыя зоркi раскладваюць тактычныя схемы...У звышнапружаным матчы Данiя абыгрывае Нiдэрланды ў бадмiнтон!

Карацей, усё ж было вядома з самага пачатку. Ёсць алiмпiйскiя бюракраты, у iх ёсць бюджэты, пад гэта праграмы, пленумы, планы развiцця ды рэгiянальнага супрацоўнiцтва... Рука руку мые. Ну, калi вялiкая алiмпiяда з футболам прыносiць страты, то малая алiмпiяда без футболу? Гэта вам не закон Архiмеда.

6
Ліцьвін металіст / Адказаць
27.06.2019 / 15:14
Гульбішчы для Расеі, каб яны пацешыліся за чужы кошт, ні хто болей на гэтую авантуру не пайшоў, адчуваю, што 2 ігры будуць апошнімі)))
5
Свободный / Адказаць
27.06.2019 / 15:22
Ура ура ненавижу эти голодные игры
Паказаць усе каментары/ 9 /
Каб пакінуць каментар, калі ласка, актывуйце JavaScript у наладах свайго браўзеру