Увечары 3 ліпеня ўрачыста адкрыўся бар «Kalinoŭski». У тэставым рэжыме бар працаваў ужо з сярэдзіны чэрвеня, але падавалі там толькі напоі.
На Зыбіцкай адкрыўся новы бар Kalinoŭski. На сценах — цытаты з «Мужыцкай праўды»
Цяпер у меню з'явіліся і закускі.
Чым будуць карміць гасцей? Сярод пазіцый — аладкі з соусам барбекю, чыпсы з кабанчыка, беларуская крэветка з таматным соусам і дранікі з розным начыннем («кабанчык», дамашні сыр з памідорамі, «бычок»). З дэсертаў прапануюць крэм на аснове рагачоўскай згушчонкі і нясвіжскі штрудзель. Цэны — ад 6 да 9 рублёў.
Па словах заснавальніка бара Аляксея Славуты, яны хацелі прэзентаваць беларускую кухню на новы лад. Меню распрацоўваў шэф-кухар Арцём Ракецкі (ён жа адказвае за кухню ў кафэ-гасцёўні «Чэхаў»).
Заснавальнік бара «Каліноўскі» пра адносіны з дзяржорганамі, беларускую мову і вясковыя інтэр'еры
На адкрыццё прыйшлі беларускія селебрыці — шоўмэн Андрэй Бонд, дызайнеркі Ірына Бойцік і Вольга Кардаш, спявак Мікіта Найдзёнаў, журналіст Франак Вячорка. Гімнастка Меліціна Станюта стаяла за столікам разам з баксёрам Віталем Гурковым. За вядучага быў Антон Мартыненка. Усім гасцям прапаноўвалі пакінуць свой аўтограф на сцяне.
Акрамя алкаголю і закусак у бары можна набыць цішотку з надпісам Kalinoŭski за 39 рублёў.
