Аляксандр Філей — сябра «Рускага саюза Латвіі», а таксама арганізатар «Татальнага дыктанта» ў гэтай краіне. 17 чэрвеня на сваёй старонцы ў фэйсбуку ён напісаў пост пра падзеі 1940 года.
Аляксандр Філей. Фота baltnews.lv.
«17 чэрвеня. Са святам. Усіх датычных сардэчна віншую са святам. Зычу ўсім сілы духу, бадзёрасці, вясёлага настрою і светлых спадзеваў. Роўна семдзесят дзевяць гадоў таму ў Латвію, пагружаную ў дыктатарскі рэжым, які будаваўся на прынцыпах злоснага нацыяналізму, быў уведзены абмежаваны кантынгент Чырвонай арміі. Гэты акт прывёў да хуткага ўсталявання савецкай улады. […]
А Латвія была зусім не супраць стаць савецкай», — напісаў Філей.
Справа была заведзеная пасля таго, як заяву ў Службу дзяржаўнай бяспекі Латвіі напісаў сябар партыі «Новае адзінства» Дзмітрый Голубеў. У выніку спецслужбы пачалі справу супраць Філея за апраўданне злачынстваў супраць чалавечнасці, Латвіі і яе народа. Публіцысту пагражае да 5 гадоў зняволення.
«Рускі саюз Латвіі» абяцае Філею ўсемагчымую падтрымку.
