З пачатку фінансавага крызісу афіцыйны курс долара ў Беларусі вырас на 30%, у Расіі — на 53%, ва Украіне — на 59%.
З пачатку фінансавага крызісу афіцыйны курс долара ў Беларусі вырас на 30,4%, у Расіі — на 53,1%, ва Украіне — на 59,1%.Такі вынік праведзенага БелаПАН аналізу дынамікі каціровак у трох краінах.
З пачатку 2008 года сітуацыя на валютных рынках гэтых дзяржаў развівалася па падобным сцэнарыі: прыкладна да сярэдзіны лета нацыянальная грашовая адзінка нязначна ўмацоўвалася, а потым з той ці іншай хуткасцю падала.
Беларусь. За першыя сем месяцаў і першы тыдзень жніўня 2008 года афіцыйны курс долара знізіўся на 1,8% — з 2.150 да 2.111 рублёў. Гэты курс (самы нізкі пасля 3 кастрычніка 2003 года) фіксаваўся з 8 жніўня па 10 верасня і з 25 верасня па 1 кастрычніка. Пасля гэтага долар падаражэў на 4,2%, і на канец года яго курс склаў 2.200 рублёў. 2 студзеня 2009 года афіцыйная каціроўка амерыканскай валюты была павышана на 20,5% да 2.650 рублёў. Да канца студзеня курс павялічыўся яшчэ на 3,8% да 2.752 рублёў (новы гістарычны максімум). Сумарны рост склаў 30,36%.
Расія. З 1 студзеня па 16 ліпеня 2008 года афіцыйны курс долара знізіўся на 5,8% — з 24,5462 да 23,1255 рубля (самы нізкі курс пасля 13 сакавіка 1999 года). Да 31 снежня долар падаражэў на 27% да 29,3804 рубля, а ў студзені гэтага года — яшчэ на 20,5% да 35,4146 рубля (новы гістарычны максімум). Сумарны рост курсу — 53,14%.
Украіна. З пачатку студзеня да другой паловы ліпеня 2008 года долар патаннеў на 4,2% — з 5,05 да 4,84 грыўны. Такая каціроўка фіксавалася 21—23 ліпеня (найменшая пасля 7 снежня 1999 года). Потым пачаўся рост афіцыйнага курсу, які да 19 снежня дасягнуў 62,8% — 7,8788 грыўны за долар, што стала новым гістарычным максімумам (наяўны — 10 грыўнаў). Да канца года афіцыйная каціроўка знізілася на 2,3% да 7,7 грыўны. На гэтым узроўні яна пратрымалася ўвесь студзень гэтага года. Сумарны рост курсу долара — 59,09%.
Каментары