БелТА
У двухбаковых адносінах паміж Беларуссю і Латвіяй не існуе прынцыповых праблем. Пра гэта заявіў кіраўнік беларускага знешнепалітычнага ведамства Уладзімір Макей сёння на перамовах з міністрам замежных спраў Латвіі Эдгарам Рынкевічсам, які 24-26 ліпеня наведвае Беларусь з рабочым візітам, перадае БЕЛТА.
Кіраўнік беларускага знешнепалітычнага ведамства падкрэсліў, што беларуска-латвійскія кантакты становяцца рэгулярнымі, у тым ліку і абмен візітамі. Акрамя гэтага праходзяць і сустрэчы паміж прадстаўнікамі дзвюх краін на міжнародных пляцоўках. Уладзімір Макей акцэнтаваў увагу на ўсталяваных цесных кантактах не толькі паміж міністэрствамі замежных спраў дзвюх дзяржаў, але і іншымі ведамствамі. Паводле яго слоў, гэта спрыяе ўсебаковаму паглыбленню супрацоўніцтва ва ўсіх сферах.
Міністр заявіў, што беларускі бок цалкам падтрымлівае развіццё палітычнага дыялогу і нацэлены на пашырэнне двухбаковых кантактаў.
Ён таксама адзначыў, што прынцыповых праблем у двухбаковых адносінах не існуе і ёсць гатоўнасць адкрыта абмяркоўваць адчувальныя пытанні.
Кіраўнік МЗС Латвіі сказаў аб пазітыўнай атмасферы двухбаковых адносін у палітычнай, эканамічнай сферах, у рамках «Усходняга партнёрства» і рэгіянальнай бяспекі. Паводле яго слоў, удалося выпрацаваць адпаведны фармат супрацоўніцтва, калі маецца высокі ўзровень ўзаемнага даверу. У ліку пазітыўных момантаў міністр назваў абмен інфармацыяй у ваеннай сферы і абмен назіральнікамі падчас вучэнняў у Беларусі і Латвіі.
Эдгар Рынкевічс таксама звярнуў увагу, што маецца шмат пытанняў, якія Беларусь і Латвія адкрыта абмяркоўваюць, у тым ліку і тыя, па якіх ёсць рознагалоссі.
Ён выказаў упэўненасць, што перамовы ў Мінску будуць дзейснымі і дадуць добры імпульс для далейшага развіцця беларуска-латвійскага супрацоўніцтва.