У пачатку ліпеня з шэрагаў Саюза пісьменнікаў Беларусі выключылі 64-гадовага Славаміра Антановіча. Сярод яго самых вядомых твораў — гістарычны раман «Пятро Машэраў».
Славамір Антановіч. Фота Вікіпедыя.
«Наша Ніва» спытала ў кіраўніка СПБ Мікалая Чаргінца, за што ж быў выключаны Антановіч.
«За паклёп. Антановіч неаднаразова дапускаў такія дзеянні, але пасля таго, як спачатку Смалявіцкі раённы суд, а потым Мінскі абласны выявілі ў ягоных словах паклёп, было вырашана прыбраць яго з ліку сяброў СПБ», — тлумачыць ён.
Справа ў тым, што ў адной са сваіх публікацый Антановіч напісаў, што Чаргінец меў дачыненне да арышту невінаватых у забойстве людзей у Мазырскім раёне. Але Чаргінец даказаў, што на той час нават не працаваў у органах МУС.
«Ягоныя паводзіны заўсёды былі для нас непрымальнымі. Ён заўсёды ходзіць п’яны, то прадстаўляўся, што ён быў памочнікам Машэрава, то казаў, што расследаваў смерць Машэрава… Ён элементарнае трапло! Ёсць у нас ліст ягонай роднай сястры на дваццаці старонках, калі яго чытаеш, то жах бярэ. Яна піша, што гэты звер ёй пагражае, п’е, прыводзіць розную шваль у кватэру маці, сваякоў параўноўвае з быдлам», — працягвае Чаргінец.
«Ён хваліўся, што працаваў памочнікам прэм’ер-міністра Генадзя Навіцкага. Сапраўды, адпрацаваў пару месяцаў, але потым яго выперлі адтуль. Я размаўляў са старшынёй Канстытуцыйнага суда Пятром Міклашэвічам, бо Антановіч хваліўся, што быў палкоўнікам юстыцыі ў пракуратуры. Выдаў нават кнігу, дзе ён на вокладцы ў форме палкоўніка, але ён і блізка не мае гэтага звання! Трапло і хвалько. І няважна, якіх ён поглядаў. Ён жа ўладу не чапае, а апазіцыю крытыкуе», — расказаў кіраўнік СПБ.
Сам Славамір Антановіч мяркуе, што яго не маглі выключыць з СПБ. Бо літаральна за два дні да паседжання прэзідыума Саюза сам напісаў заяву на выхад з арганізацыі.
«У сувязі з тым, што стыль кіраўніцтва творчай арганізацыі не адпавядае патрабаванням заканадаўства і творчаму характару пісьменніцкай дзейнасці, прашу лічыць мяне выбылым з членаў Саюза пісьменнікаў Беларусі з 09.07.2019 года», — было напісана ў заяве Антановіча.
Тым не менш галасаванне аб выключэнні Антановіча з сяброў арганізацыі ўсё ж адбылося. З усіх членаў прэзідыума ўстрымаліся толькі Анатоль Зэкаў і Уладзімір Ліпскі. Астатнія падтрымалі пазіцыю Чаргінца.
