На тусовачнай вуліцы Кастрычніцкай з'явіўся вялікі фотакалаж, прысвечаны мінскаму трамваю. Фотарэпартаж пра гэта апублікаваў TUT.BY.
Тэма не выпадковая: гэтаму віду транспарту ў беларускай сталіцы спаўняецца 90 гадоў.
Андрэй Бусел на фоне сваёй працы.
Новы арт-аб'ект можна ўбачыць у двары Галерэі сучаснага мастацтва «Ў» (вуліца Кастрычніцкая, 19). Па самой вуліцы Кастрычніцкай трамваі не ходзяць з 2015 года.
— Гэта фотакалаж, — тлумачыць аўтар, беларускі вулічны мастак Андрэй Бусел. — Гістарычны трамвай сфатаграфаваў у музеі і апрацаваў здымак. А людзей ўзяў з фатаграфій, зробленых на Камароўцы.
У калажы выкарыстоўваліся здымкі Сашы Скукі.
Праект падымае і пытанне даступнасці і адкрытасці вуліцы Кастрычніцкай для людзей розных узростаў і сацыяльных слаёў. Працу назвалі «Агульны вагон».
— Мне здаецца цікавым паспрабаваць зірнуць на Кастрычніцкую вачыма чалавека, якога выпадкова занесла ў моладзевы кластар. Давайце ўявім, што пасажыр трамвая выпадкова праехаў свой прыпынак і апынуўся ў свеце заводаў, якія раптам ператварыліся ў рэстараны і выставачныя пляцоўкі, — гаворыць Андрэй Бусел.
Андрэй Бусел на фоне сваёй працы ў двары Галерэі «Ў».