Сёння ноччу ў небе — Персеіды: самы прыгожы метэорны паток года
У жніўні Зямля праходзіць праз метэорны паток Персеіды. Калі неба яснае, за гадзіну на ім можна пабачыць дзясяткі знічак.
Пік метэорнага патоку сёлета прыпадзе на ноч з 12 на 13 жніўня.
Глядзець на Персеіды лепш за межамі населеных пунктаў: вулічныя ліхтары і святло з вокнаўперашкаджаюць бачыць метэоры ва ўсёй прыгажосці.
Персеіды - метэорны паток, які з'яўляецца штогод у жніўні з сузор'я Персея. У атмасферу Зямлі на хуткасці каля 59 км/с уваходзяць дробныя часціцы хваста каметы Свіфта-Тутля. Сама камета, ядро якой дасягае 26 км у дыяметры, набліжаецца да Зямлі раз на 135 гадоў (апошні раз — у 1992). Аднак праз шлейф пакінутых ёю пылавых часціц Зямля праходзіць штогод.
Часціцы памерам з пясчынку згараюць у атмасферы Зямлі на вышыні прыблізна 80-100 км. Хуткасць, з якой яны сутыкаюцца з атмасферай, можа вар'іравацца ад 13 да 73 км/с, гэта залежыць ад вугла падзення. Для патоку Персеіды характэрная хуткасць падзення каля 50-60 км/с. Таму маленькія часціцы, валодаючы каласальнай энергіяй, успыхваюць.
Сёлета прагназуецца досыць высокая частата метэорнай плыні — каля 120 за гадзіну.
Каментары