Грамадская рада пры МУС склікала круглы стол аб прызыўных папраўках. Якубовіч: «Я сутыкнуўся з ідыятызмам»
Новыя папраўкі ў закон аб вайсковай службе сустрэліся з абурэннем моладзі. У многіх гарадах юнакі расклейваюць улёткі супраць паправак.
У тэлеграме з'явіўся чат на 2600 чалавек, у якім каардынуюцца актывісты, ён называецца protestBY. Мадэруе яго памочнік дэпутаткі Канапацкай Дзяніс Ціханенька.
Ёсць таксама шэраг афіляваных каналаў, у адным з якіх з'явілася такая інфармацыя: «У гэты чацвер Грамадская рада пры МУС нечакана вырашыла запрасіць на круглы стол кіраўніка Цэнтра правоў прызыўніка. Яны таксама хацелі б бачыць там нейкага «студэнцкага лідара», які каардынуе рух. Тэма круглага стала — змены ў Законе аб службе. Якім бокам МУС да гэтага закона пакуль не ясна, але выглядае ўсё дзіўна».
У тэлеграм-чаце стала ясна, што на круглы стол запрасілі Сямёна Гаўрыленку, кіраўніка ініцыятывы «Цэнтр правоў прызыўніка», але тамтэйшая супольнасць сышлася на думцы, што ўсё гэта — правакацыя з незразумелымі мэтамі, таму ісці туды не рэкамендавалася.
«Які сэнс абмяркоўваць гэта пасля прыняцця закона? Хто хоча рэальна канструктыўна і эфектыўна дзейнічаць, то не пустапарожнія базары з грамадскімі радамі трэба весці, а рыхтаваць законапраект аб адмене / змяненні закона», — напісаў Ціханенка.
«Наша Ніва» адрасавала пытанне Паўлу Якубовічу — кіраўніку грамадскай Рады пры МУС, якому, як выявілася, і належала ідэя склікаць круглы стол. Ён таксама патлумачыў, чаму менавіта МУС хоча абмеркаваць гэтыя праўкі.
«У склад МУС уваходзяць значныя вайскавыя фармаванні — Унутраныя войскі. Яны камплектуюцца з прызыўнікоў, таму гэтая тэма нам не чужая. Агулам закон мае гіганцкую грамадскую значнасць, прайсці міма немагчыма. Ёсць у ім асаблівасці, якія недашліфаваныя і маюць сур'ёзныя наступствы як для лёсаў маладых людзей, так і для войска. Ну я і падумаў, што варта гэта ўсё абмеркаваць», — сказаў Якубовіч.
Па ягоных словах, усё адбудзецца ў гэты чацвер, сярод запрошаных — старшыня рэспубліканскай калегіі адвакатаў Віктар Чайчыц, рэктар Акадэміі кіравання Генадзь Пальчык, кіраўнік ДТСААФ і былы намеснік міністра абароны Іван Дырман, салдат тэрміновай службы з вышэйшай адукацыяй, які цяпер служыць ва Унутраных войсках, а таксама адзін з нядаўніх служывых «з цікавымі назіраннямі».
«Я буду мадэратарам, — дадаў Якубовіч. — Пытанні ўсе, што датычаць закона, якія абмяркоўвае грамадства. Згадаем і творчыя ВНУ, выпускнікоў кансерваторыі, харэографаў — як ім быць? Ёсць намер пагаварыць шчыра і не абмінаць вострыя вуглы. Для гэтага мне таксама хацелася б бачыць тых маладых людзей, якія востра крытыкуюць праўкі, збіраюць петыцыі і лепяць улёткі. Можа быць, я б з імі ў нечым пагадзіўся, удзельнікі б падыскутавалі, павысілі градус палемікі. Але тут я сутыкнуўся з прамым ідыятызмам! Я пазваніў ім [у Цэнтр правоў прызыўніка], патлумачыў, чаму хачу бачыць кагосьці ад іх. Што гэта магчымасць выказацца на прадстаўнічым узроўні, а не па завуголлях. Патлумачыў таксама, што гэта не запрашэнне на явачную кватэру — разумелася як жарт, а аказалася, што прадбачанне. Раптам на наступны дзень у інтэрнэце з'яўляюцца глупствы абсалютныя, што гэта ўсё аператыўныя хітрыкі і пастка. Мне ўжо пытанні пачалі задаваць: «Што такое?». І калі яны мне адзваніліся і сказалі, што яны гатовыя, то, даруйце, я ўжо вельмі брутальна ім адказаў, што калі яны схільныя да хваравітых фантазій, то хай і варацца ва ўласным інтэлектуальным саку. Я ім адкрыў абдымкі, а мне ў адказ нейкі ўродлівы камень працягнулі. Таму нічога не атрымалася», — рэзюмаваў Якубовіч.
Па ягоных словах, круглы стол адбудзецца, але без найбольш радыкальных крытыкаў. Вынікі будуць падведзены ў МУСаўскай газеце «На страже».
Сямён Ціханенка ў размове з «Нашай Нівай» пацвердзіў, што на круглы стол не ідзе, але пра прычыны адказаў сцісла: «без каментароў».
Каментары