Былая кандыдатка на пасаду прэзідэнта і кіраўніца кампаніі «Гавары праўду» Таццяна Караткевіч цяпер працуе ў недзяржаўнай арганізацыі «Свет без межаў».
Таццяна Караткевіч выступае перад калектывам Івацэвіцкага дома-інтэрната. Фота wwb.by.
Сама Караткевіч займаецца праектам для дзяцей з інваліднасцю. Грамадскае аб’яднанне «Свет без межаў» засноўвалася для арганізацыі аздараўлення беларускіх дзяцей за мяжой. Ад 2004 года яны працуюць з дзецьмі з асаблівасцямі псіхафізічнага развіцця.
«Свет без межаў» у сваёй дзейнасці актыўна супрацоўнічае з Міністэрствам працы і сацыяльнай абароны. Мабыць, менавіта таму папаўзлі чуткі, што Караткевіч працуе ў міністэрстве, але гэтыя звесткі не пацвердзіліся.
На сайце «Света без межаў» ёсць здымкі Таццяны Караткевіч падчас выступу ў Івацэвіцкім доме-інтэрнаце для дзяцей з асаблівасцямі фізічнага развіцця.
Таццяна Караткевіч скончыла псіхалагічны факультэт БДПУ, а таксама магістратуру БДУ, абаранялася па тэме развіцця сацыяльнай абароны людзей сталага ўзросту. Нейкі час яна працавала ў цэнтры сацыяльнага абслугоўвання Ленінскага раёна Мінска. На прэзідэнцкія выбары 2015 года ішла як дырэктарка сацыяльнай установы «Сямейная пляцоўка».
Таццяна Караткевіч адмовілася размаўляць пра сваю новую працу з «НН». Пакуль невядома, ці збіраецца яна ўдзельнічаць у якасці кандыдата на бліжэйшых парламенцкіх і прэзідэнцкіх выбарах.
