Да Дня беларускага пісьменства ў Слоніме прыдумалі вясёлы талісман. Да стокавай выявы льва прыфаташопілі карону і пяро. І, што цікава, гэтага было дастаткова — мясцовыя ўлады зацвердзілі лагатып.
«Не ведаю, ці былі канкурэнты. Я свой варыянт адправіла і яго прынялі. Ільва выбрала, бо ён жа на гербе Слоніма.
Праўда, спачатку сказалі перарабіць, бо нібыта надта мульцяшны. Я перарабіла, але першы варыянт, напэўна, спадабаўся больш, бо яго і пакінулі», — распавяла «Нашай Ніве» стваральніца лагатыпа Алена Лойка. Яна працуе справаводам у яслях-садку №14 Слоніма.
Герб Слоніма.
Лойка прызнаецца: выяву льва яна знайшла ў інтэрнэце, пасля чаго прыфаташопіла да яго карону, пяро і пару надпісаў.
Інтэрнэт-карыстальнікі, якія не ацанілі крутасць лагатыпа, атрымалі эмацыйны адказ ад Наталлі Грасевіч. Чалавек з такім іменем працуе намеснікам начальніка аддзела ідэалогіі Слонімскага райвынкама.
«Разумнікі, чаму не ўдзельнічалі ў конкурсе на распрацоўку талісмана, гэта раз! А вызначана было львяня як сувязь з гербам горада. І наогул, цуд — каментатары, а што вы зрабілі для горада да Дня пісьменства, акрамя вечнай незадаволенасці ў сетках. Калі шчыра, дасталі да ванітаў!» — напісала яна.
Тым часам леў ужо атрымаў імя Лявон. У яго перспектыўная будучыня.
«Да свята будуць пашыты роставыя лялькі Лявона, іх плануецца тры. Яны будуць запрашаць гасцей на падворкі, гуляць з дзецьмі, з імі можна будзе сфатаграфавацца… Адным словам, яны дакладна дададуць яркіх фарбаў Дню пісьменства, — прыводзіць словы намесніцы старшыні Слонімскага райвыканкама Тарэсы Юшкевіч суполка «Тыповы Слонім». — Да таго ж, выява талісмана свята ў Слоніме нароўні з агульным лагатыпам Дня беларускага пісьменства будзе выкарыстоўвацца на рэкламнай прадукцыі. З’явіцца ён і на сувенірах».
https://nn.by/?c=ar&i=235169