12.08.2019 / 16:45

Навукоўцы патлумачылі, што дапамагае немаўлятам адрозніваць дзень ад ночы — малако

Амерыканскія навукоўцы даказалі, што чалавечае грудное малако — не проста ежа, гэта таксама гадзіннік, які дае немаўлятам інфармацыю пра час сутак. Склад груднога малака змяняецца на працягу дня, надаючы ранішняму малаку іншую сумесь інгрэдыентаў, чым заспакаяльнае вячэрняе малако, піша Science Alert.

Даследчыкі мяркуюць, што гэта харчаванне можа дапамагчы запраграмаваць цыркадную біялогію немаўлят, стварыць у іх унутраны хранометр, які дазваляе дзецям адрозніваць дзень ад ночы.

Як вядома любому з бацькоў, які ўставаў пакарміць дзіця а 3-яй ночы, дзеці не нараджаюцца з цалкам усталяванымі рытмамі. Замест гэтага іх пачуццё дня і ночы развіваецца на працягу першых тыдняў і месяцаў жыцця. Затрымкі ў развіцці цыркаднай біялогіі могуць павялічыць рызыку ўзнікнення колікаў і прывесці да праблем росту і харчавання.

Як высветлілі медыкі, грудное малако рэзка мяняецца на працягу дня. Напрыклад, узровень карцізолу — гармону, які спрыяе бадзёрасці — у ранішнім малацэ ў тры разы вышэй, чым у вячэрнім малацэ. Мелатанін, які спрыяе сну і страваванню, звычайна нельга выявіць у дзённым малацэ, але яго ўзровень павышаецца ўвечары і дасягае піка каля паўночы.

Начное малако таксама змяшчае больш высокія ўзроўні пэўных будаўнічых блокаў ДНК, якія спрыяюць здароваму сну. Дзённае малако, наадварот, утрымлівае больш амінакіслот, якія спрыяюць актыўнасці, чым начное малако.

NN.by

Каб пакінуць каментар, калі ласка, актывуйце JavaScript у наладах свайго браўзеру