13.08.2019 / 18:27

Шалёны янот пакусаў 24-гадовую дзяўчыну ў Івацэвіцкім раёне

Шалёны янот пакусаў жыхарку Белаазёрска, паведамляе БелТА.

Жывёлу на ветэрынарную станцыю 6 жніўня прывезлі жыхары Белаазёрска — 30-гадовы мужчына і 24-гадовая дзяўчына.

З іх слоў, яны знайшлі каля дарогі янота на ўчастку трасы М1, ад'ехаўшы ад Івацэвіч у бок Бярозы не больш за 8 км. Пара спынілася, каб аднесці жывёлу ў лес. Аднак янот увязаўся за сваімі «збавіцелямі». Тады маладыя людзі вырашылі паказаць яго ветэрынарам. Па дарозе жывёла пакусала дзяўчыну. Янота пакінулі на станцыі для назірання. Раніцай на наступны дзень жывёла памерла, яе біялагічны матэрыял даставілі ў абласную лабараторыю на даследаванне. Адтуль прыйшло заключэнне: жывёла хварэла на шаленства.

Дзяўчыну і яе спадарожніка, які таксама кантактаваў з хворым янотам, шпіталізавалі ў Белаазёрскую гарадскую бальніцу. Там ім прызначылі курс прышчэпак. Зараз пацярпелыя знаходзяцца на амбулаторным лячэнні.

Каб пакінуць каментар, калі ласка, актывуйце JavaScript у наладах свайго браўзеру