Беларускую гімнастку Меліціну Станюту не пусцілі прагуляцца па вуліцы ў Мінску, названай у гонар яе прабабулі Стэфаніі Станюты. Там знаходзіцца элітны пасёлак, пабудаваны Dana Holdings. Забудоўшчык растлумачыў, у чым справа, і правёў нашчадкаў знакамітай актрысы па вуліцы, піша Tut.by.
Пасёлак на вуліцы Стэфаніі Станюты з 14 дамоў размешчаны каля Цнянскага вадасховішча, вакол прыватная забудова і лес. Участак агароджаны па перыметры, на ўездзе — шлагбаум і КПП. На мінулым тыдні Меліціну Станюту на вуліцу не прапусцілі, параіўшы звярнуцца да забудоўшчыка Dana Holdings. У кантакт-цэнтры кампаніі гімнастка не атрымала адказу.
— Як праўнучцы і ўнучцы прайсціся па вуліцы прабабулі? — пыталася спартсменка ў сацсетках.
На пытанне Tut.by, чаму тут плот і КПП, старшыня рады дырэктараў Dana Holdings Вібар Муліч адказвае: гэта рашэнне людзей, якія тут жывуць.
— Гэта закрытая тэрыторыя, вуліца нікуды не выходзіць. Так дамовіліся жыхары паміж сабой для бяспекі. Для іншых грамадзян гэтая вуліца не нясе функцыі. Але не для праўнучкі Станюты. Калі яе сюды не пусцілі — гэта было звязана з непрафесіяналізмам ахоўніка, ён няправільна сябе павёў. Для нас гэта не менш непрыемны выпадак.
Старшыня рады дырэктараў Dana Holdings Вібар Муліч.
У Dana Holdings распавялі, што пытанне вырашылася. Агульны знаёмы звязаўся з забудоўшчыкам і спартсменкай, пасля чаго дзяўчыну запрасілі прагуляцца па вуліцы яе прабабулі.
Меліціна Станюта прыехала на сустрэчу з бацькам — Дзмітрыем Станютам. Старшыня рады дырэктараў Dana Holdings Вібар Муліч правёў іх праз пункт пропуску.
На ўездзе сустракае супрацоўнік у форме, Муліч кажа, што гэта ахоўнік. На КПП стаіць камера відэаназірання. Вуліца Станюты праходзіць амаль паралельна вуліцы Кальцова, якая таксама абгароджана высокім плотам і туямі — за імі толькі бачныя дахі хат.
Цяпер вуліца тупіковая, але, магчыма, яе працягнуць.
«Дамы тут огого», — публікуе ў Instagram Меліціна.
— Мы былі вельмі рады, што сярод імён, якія атрымалі новыя вуліцы, будзе вуліца Станюты. Наша сям'я чакала, калі яна з'явіцца. Але некалькі гадоў здавалася, быццам такой вуліцы няма. Мы не ведалі, дзе яна. Летам я выязджаў на Цнянку і раптам, праязджаючы тут, убачыў гэты плот з таблічкай. Бывае так: ты ходзіш міма нейкага месца і не заўважаеш, якое яно. Так было і ў гэтым выпадку.
Дзмітрый Станюта быў непрыемна здзіўлены, што вуліца імя яго бабулі стала закрытай.
Дзмітрый Станюта.
— Не ведаю, хто тут жыве. Выглядае добра, новыя багатыя катэджы. Нагадвае карціну Драздовіча «Абсерваторыя на кальцы Сатурна», відаць, што не тутэйшы краявід. Але давайце паглядзім на гэта пазітыўна.
Пасля прагулкі Муліч паабяцаў сям'і Станюты: па папярэднім узгадненні яны могуць сюды прыходзіць.
У элітным пасёлку на вуліцы Стэфаніі Станюты зарэгістраваны 14 дамоў. Гэтыя катэджы ў 2015 годзе пабудавала Dana Holdings.
