Дарадца прэзідэнта ЗША па нацыянальнай бяспецы Джон Болтан назваў сустрэчу з Лукашэнкам, якая працягвалася больш за 2 гадзіны, вельмі важнай, піша БелТА.
Фота: БелТА.
Па словах Джона Болтана, былі абмеркаваны самыя розныя пытанні. Бакі не прыйшлі да пэўных рашэнняў, разам з тым падкрэслена важнасць праведзенай дыскусіі.
«У нас была вельмі доўгая дыскусія з прэзідэнтам Беларусі (прыкладна 2 гадзіны 15 хвілін).
Яна ахапіла вельмі шырокія тэмы — палітыку, эканоміку, пытанні бяспекі як у рэгіёне, так і ва ўсім свеце. Гэта была вельмі важная сустрэча. Вядома, мы не прыйшлі да якіх-небудзь канкрэтных рашэнняў на ёй, але было вельмі важна абмеркаваць усе гэтыя пытанні», — сказаў саветнік прэзідэнта ЗША.
Джон Болтан адзначыў, што ў Беларусі і ЗША ёсць пэўныя складанасці ў адносінах, і адпаведныя пытанні абмяркоўваліся на сустрэчы. Яшчэ адной тэмай для размовы была новая геапалітычная рэальнасць у рэгіёне і магчымасці сумеснай работы ў гэтым плане.
Адказваючы на пытанне БелТА пра тое, ці абмяркоўвалася магчымасць аднаўлення дыпламатычнага прадстаўніцтва паміж Беларуссю і ЗША на ўзроўні паслоў, дарадца амерыканскага прэзідэнта сказаў: «Мы не абмяркоўвалі гэтае пытанне. Як вы ведаеце, у нас былі складаныя моманты ў двухбаковых адносінах, і нам трэба бачыць прагрэс у пэўных сферах для таго, каб у нас быў прагрэс у аднаўленні дыпламатычнага прадстаўніцтва. Я прыехаў сюды без намеру даць адказы на падобныя пытанні».
