Жывёлу, якую танула ў дрыгве, паміж вёскамі Боўблі і Харужава пабачылі жанчыны, што ішлі ў лес у грыбы, паведамляе Наш час.
Дапамагчы небараку, што трапіў у балота па самую шыю, яны самі не здолелі. Пайшлі па дапамогу і на ўскрайку лесу жанчыны сустрэлі двух мужчын. Гэта былі дырэктар Ваўкавыскай арганізацыі паляўнічых і рыбаловаў і егер, што «палявалі» на браканьераў.
Але і іх сілаў аказалася замала, прыйшлося звяртацца да іншых паляўнічых таварыства. Тэхніку падагнаць да балота было не магчыма, таму прыйшлося цягнуць жывёліну з багны сваімі сіламі.
Але выратаваная жывёла не змагла адразу ж сысці ў лес - сіл у яе не засталося. Яе на нейкі час пакінулі пад наглядам, каб аматары лёгкай нажывы раптам не ўчынілі расправу…
Праз нейкі час алень акрыяўшы сышоў у лес, а паляўнічыя абгарадзілі небяспечнае месца, закідаўшы галінкамі, каб іншыя звяры раптам не патрапілі ў прыродную пастку.
