10.09.2019 / 18:37

Мова наша. Халтама, халтаманка: ці трэба крыўдаваць, калі вас так назвалі?  12

Цікавае слова ўзгадала ў суполцы «Толькі пра мову» ў фэйсбуку адна з яе ўдзельніц: «Бацькі мяне з маленства любоўна дражняць «Янка-халтаманка». Спрабавала шукаць значэнне і паходжанне — без выніку. А хто-небудзь чуў яшчэ калі слова «халтаман»?» — запыталася яна ў абазнанай аўдыторыі.

На дапамогу тут жа прыйшлі і адмыслоўцы, і проста чулыя да мовы людзі. Вінцук Вячорка прывёў слоўнікавы артыкул, у якім тлумачыцца гэтае эмацыйнае слоўца: халтама — пустамалот, халтаміць — гаварыць глупства, мітусіцца, рабіць абы-што (пазначана, што ўзятае слова з Дрысеншчыны).

Прыгадала такое слова і пісьменніца Таццяна Барысік, якая з Бабруйшчыны. Крыху ў іншым сэнсе выкарыстоўвалі яго ў яе сям'і: «Халтама, расхрыстаны — змалку чула. Яшчэ неахайнага маглі зваць рохля або рахеша». 

Некаторыя ўдзельнікі ўзгадалі, у якіх формах гэтае слова жыло ў іх мясцовасцях: «халтамешка» — ласкава казалі на Лепельшчыне, «халтамашка» — на Вушаччыне. 

«Вушацкі кнігазбор» Рыгора Барадуліна таксама ведае, хто такая халтама, халтамешка — няскладная, раскідзістая, несабраная: «Паглядзі, халтама, якая сама. У халтамешкі вецер у галаве, туман у вачох». 

NN.by

3
Жвір / Адказаць
10.09.2019 / 19:18
 халтама — пустамалот, халтаміць — гаварыць глупства, мітусіцца, рабіць абы-што...
Дык вось, перадайце таму Вячорку, што халтама —  гэта з хіндзі (chalta man) азначае жывы й рухомы розум ! Хаця, мажліва, што гэта слова перадае сэнс, ціпа, звіхнуты, падзьвінуты розумам... Вось і думайце, ці засмучацца тут, ці радвацца...
0
belariy / Адказаць
10.09.2019 / 19:50
на Пастаўшчыне таксама часта чуў гэта слова, у тых сэнсах, што пішацца ў артыкуле.
1
Юзік Крулеўскі / Адказаць
10.09.2019 / 20:42
Халтама!  Яшчэ й цяпер можна пачуць такое слова ў Глыбокім.  Халтама, гэта чалавек, які заўсёды спяшаецца, мітусіцца, робіць справу абы як, усё валіцца з рук.
Паказаць усе каментары/ 12 /
Каб пакінуць каментар, калі ласка, актывуйце JavaScript у наладах свайго браўзеру