Адам Міхнік: Лукашэнка — гэта такі дыктатар, які ўтрымаў незалежнасць Беларусі як дзяржавы
Галоўны рэдактар польскага выдання Gazeta Wyborcza і былы дысідэнт Адам Міхнік наведаў Вільню, і на просьбу журналістаў delfi.lt сказаў некалькі слоў пра сітуацыю ў Беларусі.
Міхнік сказаў, што не ведае дакладна, чаму Лукашэнка не паехаў у Варшаву на мерапрыемствы, прысвечаныя 80-годдзю пачатку Другой сусветнай вайны.
«Толькі ён ведае, чаму не паехаў. Але я думаю, што істотна на яго рашэнне паўплывала тое, што не паехаў ніхто з Масквы. Па-мойму, гэта было пэўным чынам у кантэксце адносін Пуціна. З іншага боку, мне здаецца, што Пуцін бы не прыехаў», — сказаў польскі рэдактар.
Міхнік упэўнены, што ў Лукашэнкі ёсць адчуванне вялікай залежнасці ад Пуціна.
«А калі б ён паехаў, то на гэтым бы нічога не зарабіў», — сказаў рэдактар Gazeta Wyborcza.
У Міхніка падчас паездкі не склалася ўражанне, што Беларусь — дзяржава запалоханых людзей.
«Са мной размаўлялі нармальна, вельмі адкрыта. Без страха. Я быў ва ўніверсітэце, сустракаўся з моладдзю. У мяне было вельмі пазітыўнае ўражанне, калі весці гаворку пра грамадства», — сказаў былы польскі дысідэнт.
Таксама Міхнік паразважаў пра ролю Лукашэнкі.
«Склалася меркаванне, што Лукашэнка — гэта такі дыктатар, які, аднак, утрымаў незалежнасць Беларусі як дзяржавы. Так пра яго будуць успамінаць. Што гэта не крывавы дыктатар, накшталт як у Туркменістане або Таджыкістане, або Узбекістане. Гэта крыху іншае. Гэта не азіяцкая дыктатура. Вядома, мне гэта не падабаецца. Аднак у яго ёсць адчуванне, што яму бліжэй да Пуціна, чым да Сталіна», — сказаў рэдактар.
«Не хацеў бы, аднак, лічыць, што пра яго можна гаварыць такой самай мовай, што і пра дыктатуры накшталт камуністычнай. Тут нешта іншае. У грамадстве больш шырокі веер свабоды. Я бачыў у кнігарні разнастайныя кнігі. Чуў вельмі адкрытыя дыскусіі. Бізнэс бывае дастаткова незалежным. Гэта дазваляе адчуваць умераны аптымізм у адносінах да будучыні: нават Лукашэнка не вечны. Нават Сталін не быў вечным», — адзначыў спадар Міхнік.
Цяпер чытаюць
Памятаеце палітвязня Вітухноўскага, які пайшоў ваяваць за Расію? Ён ужо загінуў6
Каментары