Пакуль нацыянальная і маладзёжная зборныя гулялі свае матчы еўракваліфікацыі, у чэмпіянаце Беларусі адбыліся ажно дзве трэнерскія адстаўкі. Свае працоўныя месцы пакінулі Аляксей Мяркулаў з «Гомеля» і Вадзім Скрыпчанка з «Тарпеда-БелАЗ».
Навіну з поўдня Беларусі можна назваць чаканай, нават доўгачаканай — на апошні матч з «Іслаччу» заўзятары «Гомеля» прынеслі банер «Хватит МЕРКнуть», намякаючы на прозвішча галоўнага трэнера. Іх жаданні нарэшце былі пачутыя — цяпер трэніраваць «бела-зялёных» будзе легенда зборнай Аляксандр Кульчы.
У Скрыпчанкі ж адносіны з фанатамі таксама былі не найлепшымі — тыя, як і гамельчукі, прысвяцілі яму банер «Хопіць СКРЫПець», дадаўшы да яго графіці «Скрыпчанка — ганьба Тарпеда».
У выніку жодзінцы засталіся без галоўнага трэнера. Такі крок з боку кіраўніцтва «Тарпеда-БелАЗ» выглядае дзіўным: так, апошнія вынікі каманды складана назваць станоўчымі, але Скрыпчанку варта было даць больш часу, бо ён, па сутнасці, ствараў у Жодзіне новую каманду пасля такой жа дзіўнай адстаўкі Алега Кубарава. Трэнерская рулетка дакладна не пойдзе на карысць жодзінскай камандзе.
Цяпер пераходзім да падзей наступнага тура.
«Тарпеда-БелАЗ» — «Нёман»
- 14.09, 16:00. Жодзіна, стадыён «Тарпеда».
- Каэфіцыенты: «Тарпеда» (перамога) — 1,77; нічыя — 3,58; «Нёман» (перамога) — 4,45
- Матч першага круга — 0:0
На дваіх у жодзінцаў і гарадзенцаў за апошнія 6 тураў — усяго 1 перамога, і тая — тэхнічная над мінскім «Тарпеда». Таму самі разумееце, наколькі важнай будзе гульня для абедзвюх каманд.
Падчас паўзы клубы правялі спарынгі з замежнымі камандамі: «Тарпеда» перамагло ў гасцях тульскі «Арсенал» (1:0), а «Нёман» дома згуляў унічыю з літоўскім «Рытэраем» (1:1). Варта адзначыць, што гэты матч быў дабрачынным — сродкі збіраліся для гарадзенскага інтэрната для дзяцей з парушэннямі слыху.
Прагноз «НН»: З пагаршэннем вынікаў знізіўся і галявы патэнцыял абедзвюх каманд. У гульні, дзе вельмі важна здабыць балы, складана чакаць вялікай колькасці галявых момантаў і забітых мячоў. Таму спрагназуем тотал, меншы за 2.5.
«Дынама-Брэст» — «Мінск»
- 14.09, 18:30. АСК «Брэсцкі».
- Каэфіцыенты: «Дынама» (перамога) — 1,31; нічыя — 5.25; «Мінск» (перамога) — 8,60
- Матч першага круга — 2:1
Перад міжнароднымі матчамі барысаўскі БАТЭ зрабіў класны прэзент берасцейцам, прайграўшы «Мінску». Цяпер «Дынама» нават па згубленых балах апярэджвае барысаўчан.
Але цяпер «Мінск» едзе ў Брэст. Ці адбудзецца яшчэ адно зняцце скальпаў, або «гараджане» патрапяць пад берасцейскі каток?
Гульцы «Мінска» святкуюць перамогу над БАТЭ. Фота: ФК «Мінск».
Прагноз «НН»: Абедзве каманды паказваюць цікавы атакуючы футбол. У суботу вечарам, калі надвор'е не парадуе, дакладна парадуюць футбалісты. Таму прагноз такі: тотал, большы за 2.5.
БАТЭ — «Гарадзея»
- 14.09, 20:45. «Барысаў-Арэна».
- Каэфіцыенты: БАТЭ (перамога) — 1,285; нічыя — 5,45; «Гарадзея» (перамога) — 9,20
- Матч першага круга — 0:1
Мы ўсе добра ведаем, якія прыгоды адбываюцца з БАТЭ ў Гарадзеі, але на «Барысаў-Арэне» гаспадары звычайна праблем не адчуваюць у гульні з «цукровымі».
Можа, і добра, што пасля вылету з еўракубкаў і крыўднай паразы ад «Мінска» настала паўза — добрая нагода абнуліцца і сабраць усе сілы на апошнюю траціну чэмпіянату.
Прагноз «НН»: Перамога БАТЭ.
«Славія» — «Энергетык-БДУ»
«Славія» ў мінулым туры мела ўсе шанцы адабраць балы ў брэсцкага «Дынама» — пры ліку 2:3 мазырчукі атрымалі права на пенальці, але не змаглі яго рэалізаваць. Пасля гэтага прапусцілі яшчэ адзін і прайгралі.
«Студэнты» таксама мелі шанец зачапіцца за гульню з «Шахцёрам» — некаторы час мінчукі гулялі з кадравай перавагай, але таксама атрымалі паразу, якая стала чацвёртай у пяці апошніх матчах. А нічыя «Гомеля» апусціла «Энергетык» у зону вылету.
Прагноз «НН»: «Славія» не прайграе. За кошт больш дасведчанага і згулянага складу мазырчукі змогуць перамагчы.
«Іслач» — «Шахцёр»
У пачатку сезона «ваўкі» з «гарнякамі» гулялі ў паўфінале Кубка Беларусі, дзе выдалі два яркія матчы. Пасля быў матч чэмпіянату, не такі выніковы, але за ім пацягнуўся шлейф варожасці паміж Віталём Жукоўскім і Сяргеем Ташуевым.
Цяпер зноў прыйшоў час даказаць усё адзін аднаму на полі. Тым больш «Іслач» не можа перамагчы вось ужо тры туры запар.
Прагноз «НН»: «Шахцёр» пераможа. У апошніх турах у прагнозах на перамогу «Іслачы» мы стабільна памыляліся, таму цяпер вось так.
«Дынама-Мінск» — «Слуцк»
У нядзелю можна зладзіць футбольны марафон. Спачатку можна наведаць матч на «Камвольшчыку» (або матч НФК супраць «Смаргоні» ў першай лізе, які пачнецца а 16-й), а потым паехаць на «Дынама», дзе аднайменны клуб будзе прымаць «Слуцк».
Нягледзячы на тое, што случчакі ў першым крузе перамаглі ў «Дынама», статыстыка сустрэч «цукровых» з топавымі беларускімі камандамі застаецца незайздроснай. Тым больш у гасцях.
Прагноз «НН»: «Дынама» пераможа. Нягледзячы на хатні разгром «Віцебска», не надта верыцца ў перспектывы «Слуцка».
«Віцебск» — «Гомель»
Як мы расказвалі раней, «Гомель» застаўся без Аляксея Мяркулава. Матч з «Віцебскам», які даўно жадае, каб гэты сезон прайшоў як страшны сон, стане першым для Аляксандра Кульчыя. І звычайна змена трэнера станоўча адбіваецца на гульні каманды.
«Віцебск» падпісаў чарговага незразумелага замежніка. Ім стаў 30-гадовы расійскі форвард Аляксандр Пруднікаў, які мае бэкграўнд з амаль усіх расійскіх каманд (у тым ліку і топавых), але ў апошні час кар'ера Пруднікава ўяўляе сабой нешта незразумелае.
Прагноз «НН»: «Гомель» не прайграе.
У сувязі са зняццем з чэмпіянату мінскага «Тарпеда» ва ўсіх астатніх матчах «аўтазаводцам» будзе прысуджана тэхнічная параза 0:3. На гэты раз пашанцавала «Дняпро».
ТУРНІРНАЯ ТАБЛІЦА
Дзяліцеся прагнозамі ў каментарах і абавязкова схадзіце на стадыён! Лічыце сябе экспертам у беларускім футболе — зрабіце стаўку ў Букмекерскай канторы Марафон!