Суд Мінскага раёна вынес рашэнне па справе аб здарэнні ў парку актыўнага адпачынку «Кольт» у Ратамцы, дзе такса «разарвала» твар дзіцяці. Гаспадару сабакі далі штраф, піша Tut.by
Гэта быў адміністрацыйны працэс. Справа разглядалася па ч. 2 арт. 15.47 КаАП (Парушэнне правілаў утрымання сабак, катоў і (або) драпежных жывёл, што пацягнула прычыненне шкоды здароўю людзей). На гаспадара сабакі Аляксандра Вараксу наклалі штраф 30 базавых велічынь (765 рублёў).
Нагадаем, у жніўні 8-гадовую дачку мінчанкі Кацярыны Вайніловіч-Ясючэні запрасілі на дзень нараджэння. Дзіцячае свята праходзіла ў парку актыўнага адпачынку ў Ратамцы. Пакуль бацькі імянінніцы аплачвалі квэст, дзеці апынуліся побач з таксай іншых адпачывальнікаў.
Кацярына Вайніловіч-Ясючэня — мама Кіры-Даменікі. Фота: Дар'я Буракіна, TUT.BY
Па словах Кацярыны, сабака «парваў» твар яе дачкі Кіры-Дамінікі, дзіця аперавалі, больш за тыдзень дзяўчынка правяла ў бальніцы. Аляксандр Варакса, гаспадар сабакі, казаў, што ў той дзень адбыўся жахлівы збег абставінаў. Пса Амура ўкусіла аса. Сабаку прывязалі крыху далей ад альтанкі, дзе быў яго ўладальнік. Калі Кіра з кампаніяй падышлі да жывёлы, побач знаходзіўся сябар Аляксандра. Надзвычайнае здарэнне адбылося ў лічаныя хвіліны. Што менавіта стала прычынай бяды, гаспадар на той момант не разумеў, ён меркаваў, што дзяўчынка нахілілася, каб пацалаваць сабаку.
