Пра гэта заявіў у суботу ў Вільні міністр замежных спраў Беларусі Сяргей Мартынаў.
Літоўцам няма патрэбы непакоіцца наконт атамнай станцыі, пабудаваць якую плануе Беларусь, ‑ заявіў у суботу ў Вільні міністр замежных спраў нашай краіны Сяргей Мартынаў.
Паводле ягоных словаў, беларусы будуць выконваць абавязацельствы адносна бяспекі, а праект павінен стаць не аб’ектам дыскусій, а кансультацый.
«Падстаў для непакою няма», ‑ сказаў Сяргей Мартынаў.
Паводле яго словаў, падрыхтоўчыя працы па будаўніцтве АЭС Беларусь плануе правесці разам з міжнароднымі арганізацыямі, уключна з МАГАТЭ. Апроч таго, Мінск мае намер выконваць абавязкі, што тычацца радыяцыі.
Міністр замежных спраў Літвы Вігаўдас Ушацкас у сваю чаргу адзначыў, што кожная краіна рашэнне пра будаўніцтва АЭС прымае самастойна. «Мы, як суседзі, зацікаўленыя ў тым, каб з намі ўзгадняліся даследаванні пра ўплыў на навакольнае асяроддзе, і каб станцыя адпавядала самым высокім стандартам бяспекі», — сказаў ён.
У суботу ў Вільні адбылася трохбаковая сустрэча міністраў замежных спраў Літвы, Беларусі і Украіны.У ліку іншых пытанняў абмяркоўвалася пытанне пра магчымасць імпарту ў Літву ўкраінскай электраэнергіі. Адпаведныя дамовы будуць падпісаныя ў траўні.
«Мы перадолелі стадыю прыгожых словаў і бяздзеяння. Гэта сустрэча сведчыць пра тое, што мы сапраўды бярэмся за энергетычныя пытанні», ‑‑ рэзюмаваў міністр замежных спраў Украіны В. Агрызка.
Цяпер чытаюць
Былы галоўны ідэолаг Беларусі прадаў дом у Драздах за $600 тысяч3
Каментары