У Вінніцкай вобласці Украіны малады чалавек ажаніўся са стрыечнай бабуляй, каб атрымаць адтэрміноўку ад войска, паведамляе kp.ua.
Гэта адбылося яшчэ два гады таму. 24 гадовы мужчына ўзяў у жонкі 81-гадовую жанчыну, бо яна — інвалід першай групы, і пасля вяселля аўтаматычна становіцца яе апекуном.
У ваенкамаце прызналі, што з пункту гледжання заканадаўства гэта з'яўляецца прычынай для атрымання адтэрміноўкі.
«Хоць у шчырасць пачуццяў ніхто не верыць, з юрыдычнага пункту гледжання — усё чыста, - адзначае намеснік ваеннага камісара Ігар Лішчук. — Больш за тое, гісторыя мае працяг. У іх усё добра, 82-гадовая жонка жыве са сваім юным мужам. Нядаўна яго бацька прынёс даведку, што сын дагэтуль знаходзіцца ў шлюбе з жонкай сталага ўзросту, даглядае яе. Гэты дакумент пацвярджае адтэрміноўку ад прызыву. І хоць гісторыя вельмі сумніўная, прычапіцца немагчыма. У законе не напісана, якога ўзросту павінна быць жонка».
Як паведамілі ў Міністэрстве абароны Украіны, парушэнняў у справе ніякіх не знайшлі - ім далі ўсе патрэбныя дакументы, якія даюць права адкласці службу ў войску.
Зінаіда — інвалід па зроку. Суседзяў пазнае па галасах альбо калі падысці ўшчыльную. Яе апісваюць як інтэлігентную жанчыну, нічога дрэннага не кажуць. Ды і пра сям'ю ніякія чуткі не ходзяць - аб унуку не пляткараць з павагі да яго «жонкі». Яна сама не падымае гэтую тэму, і яе стараюцца не траўмаваць. Раней у вёсцы паверыць не маглі, што такое здарылася, а сама Зінаіда нібыта была ўпэўненая, што яе павезлі не пад вянец, а афармляць апякунства.
