Аляксандр Лукашэнка даручыў дзяржсакратару Рады бяспекі і міністру абароны распрацаваць і ў найбліжэйшы час прадставіць яму план мерапрыемстваў па адэкватным рэагаванні на дзеянні, звязаныя з размяшчэннем у Літве каля мяжы з Беларуссю бранятанкавай тэхнікі і кантынгенту ўзброеных сіл ЗША. Пра гэта журналістам паведаміў дзяржаўны сакратар Рады бяспекі Беларусі Станіслаў Зась, перадае карэспандэнт БелТА.
Паводле слоў дзяржсакратара Рады бяспекі, у Літву ўжо прыбываюць падраздзяленні амерыканскай бранятанкавай дывізіі. Пры гэтым месцам дыслакацыі абраны палігон Пабрадэ літаральна за 15 кіламетраў ад мяжы з Беларуссю. «Гэта адзін з найбуйнейшых ваенных палігонаў на тэрыторыі Літвы. Да гэтага часу амерыканскіх падраздзяленняў у гэтай краіне не было. Зараз яны там з'яўляюцца. Перш за ўсё прыбылі танкавыя падраздзяленні», — сказаў Станіслаў Зась.
Ён падкрэсліў, што ў гэтай сітуацыі нельга быць проста назіральнікам. «У любой краіне прапрацоўваюцца меры ў адказ. І кіраўнік дзяржавы паставіў задачу Дзяржсакратарыяту і Міністэрству абароны ўнесці прапановы па рэагаванні на гэты факт. Такія прапановы будуць адпрацаваны і пра іх паведамяць прэзідэнту ў пачатку наступнага тыдня», — заявіў Дзяржсакратар Рады бяспекі.
Станіслаў Зась асабліва падкрэсліў, што гэтыя дзеянні робяцца на фоне росту напружанасці ў рэгіёне і свеце, што ўплывае і на стан бяспекі. «Нам гэтага не трэба. Ці патрэбна Літве такая дадатковая напружанасць паміж нашымі дружалюбнымі народамі, хай яны самі прымаюць рашэнне», — выказаўся ён.
Тое ж самае тычыцца і пытання заклапочанасці беларускага боку з нагоды маштабных вучэнняў НАТА Defender Europe, якія плануецца правесці вясной 2020 года.
Цяпер чытаюць
«Я хачу справядлівасці — і для жанчын, і для сябе». Шчырая гутарка з Андрэем Стрыжаком пра скандал з дыкпікамі, залежнасці і будучыню27
Каментары