Лельчыцкага ксяндза ўсё ж аштрафавалі за крыж.
У пятніцу Лельчыцкі раённы суд аштрафаваў пробашча парафіі Найсвяцейшага Сэрца Ісуса і Маці Божай Фацімскай ксяндза Віталя Мышону. Пазоў у суд падалі раённыя ўлады ў асобе галоўнага архітэктара Вячаслава Асіпенкі і начальніка землеўпарадкавальнай і геадэзічнай службы Анатоля Бялоцкага. Ксяндза вінавацілі ў незаконным захопе зямлі і невыкананні прадпісанняў органаў улады. У выніку суддзя Аляксей Бялоцкі пакараў айца Віталя штрафам у памеры 3 базавых адзінак (Br105 тыс.). Наконт зносу крыжа рашэнне суд не вынес. Нагадаем, што раней райвыканкам дазволіў усталяваць крыж, але пазней чыноўнкіі выставілі дадатковыя патрабаванні, падалі у суд на пробашча парафіі і прайгралі справу.
Справа мела розгалас, на яе мусілі рэагаваць чыноўкі аблвыканкаму.
У часе судовых паседжанняў выявілася, што чыноўнікі акрамя ўсяго маюць прэтэнзіі да эстэтычнага выгляду крыжа. У мінулую сераду, як піша ў сваім блогу гарадзенскі журналіст Андрэй Пачобут, які прысутнічаў на судзе,
архітэктар Асіпенка заявіў літаральна наступнае: «Ён самалётам і верталётам канечне не перашкаджае, але выглядае не зусім эстэтычна».Пачобут паведамляе таксама, што з блізкіх да кіраўніцтва райвыканкама крыніцаў яму стала вядома, што
мясцовыя ўлады хочуць, каб з крыжа прыбралі выяву Хрыста і надпіс на латыні, а сам крыж падкарацілі на адзін метр і, магчыма, перанеслі на іншае месца.
Той самы «неэстэтычны» крыж.
Крыж, што стаіць ад кастрычніка мінулага году на ўездзе ў Лельчыцы, усталяваны ў гонар святога Канстанціна, які, паводле падання, у 313 годзе перад рашучай бітвай пабачыў у небе выяву ў выглядзе крыжа. Канстанцін перамог і зрабіў хрысціянства дзяржаўнай рэлігіяй Рымскай імперыі. На лельчыцкім крыжы ёсць цытата лацінай з таго падання — «In hoc signo vinces» («У гэтым знаку ты пераможаш»).