БелТА
Беларусь працягне паслядоўную рэалізацыю знешнепалітычнага курсу на зніжэнне ваенна-палітычнай напружанасці ў Еўропе і падтрыманне ўзаемапаважлівага дыялогу краін-партнёраў у імя захавання міру і бяспекі.
Пра гэта заявіў Дзяржаўны сакратар Рады бяспекі Беларусі Станіслаў Зась, каментуючы па просьбе БЕЛТА вынікі праведзенай напярэдадні сустрэчы з часовым павераным у справах ЗША ў Беларусі Джэніфер Мур.
«Беларускі бок выказаў занепакоенасць з нагоды размяшчэння ў Літве амерыканскіх салдат і цяжкай ваеннай тэхнікі. Гэта і стала асноўнай тэмай нашай размовы з высокапастаўленым дыпламатам ЗША, — падкрэсліў Станіслаў Зась. — Ініцыятыва сустрэчы сыходзіла ад амерыканскага боку».
«Мы ўдзячныя за тлумачэнні па мэтах разгортвання вайскоўцаў і ваеннай тэхнікі ЗША на палігоне Пабрадэ, планам іх знаходжання і канкрэтных тэрмінах вяртання да месцаў пастаяннай дыслакацыі. Акрамя таго, была прадастаўлена дадатковая інфармацыя пра задуму вучэння «Абаронца Еўропы — 2020», — адзначыў дзяржсакратар Рады бяспекі.
Станіслаў Зась лічыць: «У цэлым аператыўнасць рэагавання і кіраўніцтва НАТА, і краіны — лідэра Паўночнаатлантычнага альянсу на нашы пытанні сведчаць аб тым, што голас Беларусі быў пачуты, а наша пазіцыя — прынятая да ўвагі. Гэта важна для нас. Значна і тое, што падчас размовы пацверджана агульнае імкненне знізіць засцярогі вакол гэтай праблемы і забяспечыць транспарэнтнасць прыняцця падобных рашэнняў у будучыні.
Неабходна заўважыць, што сама сітуацыя ўзнікла ва ўмовах недахопу даверу і інфармаванасці.
І вельмі важна, што амерыканскія партнёры праявілі імкненне да адкрытага і канструктыўнага дыялогу ў духу патрабаванняў Венскага дакумента аб мерах умацавання даверу і бяспекі».
Беларусь са свайго боку таксама гатова ўнесці адпаведныя карэктывы ў планы ў адказ рэагавання на размяшчэнне замежных вайсковых кантынгентаў на сваіх межах. «Гэтая прапанова ўжо адобрана прэзідэнтам Беларусі», - звярнуў увагу Станіслаў Зась.
«Разам з тым пазіцыя нашай краіны аб недапушчальнасці мілітарызацыі рэгіёну застаецца нязменнай, - заявіў дзяржсакратар Рады бяспекі. — Мы працягнем паслядоўную рэалізацыю знешнепалітычнага курсу, накіраванага на зніжэнне ваенна-палітычнай напружанасці ў Еўропе і падтрыманне ўзаемапаважлівага дыялогу краін-партнёраў у імя захавання міру і бяспекі».
