У Беларусі ў 2020 годзе плануюць закупіць супрацьпухлінныя рэагенты на 60 млн рублёў. Пра гэта паведаміў у нядзелю міністр аховы здароўя Уладзімір Каранік на тэлеканале СТВ.
«Каля 30% фінансавання беларускай медыцыны ідзе на барацьбу з анкалагічнымі захворваннямі. Налета бюджэт будзе некалькі павялічаны. На закупку проціпухлінных рэагентаў выдзелена каля 60 млн рублёў», — сказаў Каранік.
Таксама ў планах — вырашыць праблему доўгага чакання дапамогі. «Мы плануем укараніць механізм акрэдытацыі. Гэта значыць анкалагічныя ўстановы будуць акрэдытаваны пад пэўны від дапамогі. Калі пацыенты маюць патрэбу ў нейкіх рэдкіх методыках медыцынскай дапамогі, іх павінны накіроўваць у РНПЦ анкалогіі. Калі лячэнне можна атрымаць па месцы жыхарства, то там дапамога і павінна аказвацца. Такім чынам, пераразмеркаванне плыняў пацыентаў і стварэнне рознаўзроўневай сістэмы аказання медыцынскай дапамогі здыме пытанне чэргаў і працягласці чакання», — растлумачыў ён.
Паступова вырашаецца і пытанне лекавай забяспечанасці. У прыватнасці, распавёў міністр, сёння амаль уся базавая хіміятэрапія - адсоткаў 80 - выпускаецца айчынным вытворцам.
Асвойваецца і імунатэрапія. «Мы ўдзельнічаем у клінічным выпрабаванні і сумеснай распрацоўцы дадзеных прэпаратаў. Мы спадзяемся, што імунатэрапія — самы сучасны напрамак — будзе даступны для нашых пацыентаў ужо ў наступным годзе», — адзначыў Каранік.
