17 лістапада ДАІ на вуліцы Свярдлова спыніла аўтамабіль «Крайслер» з рэгістрацыйным знакам нявызначанага ўзору, паведамляе міліцыя.

Надпіс BYS выкарыстоўваюць у самапальных дакументах так званыя «грамадзяне БССР». На нумар наклеена нешта падобнае да герба СССР і эмблема «жывых чалавекаў» — людзей, якія не прызнаюць незалежную Беларусь і лічаць сябе грамадзянамі БССР.

Супрацоўнікі ДАІ адправілі аўтамабіль на штрафстаянку.

Кіроўца — 45-гадовы ўраджэнец Мінска. Ён прыцягваўся да адміністрацыйнай адказнасці больш за 60 разоў за стварэнне аварыйнай сітуацыі, праезд скрыжавання на чырвонае святло, няпропуск пешахода і іншыя парушэнні.

Цяпер на яго склалі пратакол за кiраванне са схаваным, падробленым або iншым чынам змененым рэгiстрацыйным знакам. Ён атрымае штраф ад дзесяці да дваццаці базавых велічынь.

Хочаш падзяліцца важнай інфармацыяй ананімна і канфідэнцыйна?