Дэпутаты Палаты прадстаўнікоў 19 лістапада прынялі ў першым чытанні праект рэспубліканскага бюджэту на 2020 год. Праект бюджэту прадставіў першы намеснік міністра фінансаў Юрый Селіверстаў, паведамляе БелТА.
Паводле яго слоў, праект бюджэту на 2020 год прадугледжвае:
— тэмп рост ВУП 101,9%,
— рост сярэднегадавой інфляцыі 105%,
— стаўку рэфінансавання на ўзроўні 9,5%,
— кошт на нафту маркі URALS — 60 даляраў за бараль,
— перапрацоўку імпартнай нафты з Расіі ў аб’ёме 18 млн тон.
Даходы бюджэту на 2020 год сфарміраваныя ў суме 24,4 млрд беларускіх рублёў (прырост на 0,3% да ўзроўню 2019 года), выдаткі — у 25,4 млрд рублёў (111,4% да чаканых у 2019 годзе). Такім чынам, праект бюджэту сфармаваны з дэфіцытам у 995,1 мільёна рублёў.
«Даходная база разлічаная ва ўмовах нарастання ўплыву падатковага манеўру. Агульны абʼём страт даходаў бюджэту ў 2020 годзе ацэньваецца ў 1,9 млрд рублёў», — сказаў Юры Селіверстаў.
Паводле яго, на зарплаты бюджэтнікаў у 2020 годзе дадаткова накіруюць каля 1,8 млрд рублёў, што «дасць магчымасць выканаць узгодненыя урадам графікі павышэння заробкаў педагагічных і медыцынскіх работнікаў». Усяго выдаткі на аплату працы складуць больш за трэць ад агульнага абʼёму (з улікам адлічэнняў на сацыяльнае страхаванне).
Выдаткі на сацыяльную сферу павялічацца не менш чым на 11%.
У праекце бюджэту прадугледжаныя таксама сродкі на падаўжэнне фінансавання сямейнага капіталу на сярэднетэрміновы перыяд (каля 350 млн рублёў), на аднаразовую дапамогу ветэранам Вялікай Айчыннай вайны, да 75-годздзя Перамогі (18 млн рублёў). Прадугледжаныя і пэўныя навацыі ў жыллёвым будаўніцтве.
Павялічаць падтрымку абласцям Беларусі: амаль на траціну (да 5,3 млрд рублёў) узрасце памер сродкаў, якія перадаюцца ў мясцовыя бюджэты з рэспубліканскага.
