mlyn.by

Днём 1 снежня ў доме шматдзетнай сям'і ў вёсцы Блонь здарыўся пажар. У выніку здарэння загінула 34-гадовая гаспадыня і яе швагер. Дзве дзяўчынкі 11 і 13 гадоў атрымалі апёкі, піша Tut.by.

Самому старэйшаму ў сям'і 13 гадоў, малодшаму — год і тры месяцы. Пасля пажару чацвёра апынуліся ў Пухавіцкім раённым сацыяльна-педагагічным цэнтры, траіх з нязначнымі траўмамі шпіталізавалі ў мясцовую бальніцу.

— Сёння мы іх забярэм і таксама перадамо ў прытулак, - распавядае Алена Шастакова, намеснік начальніка ўпраўлення па адукацыі, спорту і турызму Пухавіцкага райвыканкама. — Яшчэ дзве дзяўчынкі знаходзяцца ў Мінску ў апёкавым цэнтры. Туды нікога не пускаюць. Усё, што трэба ім для лячэння, мы перадалі.

Падчас пажару ў дзяцей згарэла ўсё. Але дзякуючы спагадлівасці людзей, цяпер, кажа Алена Шастакова, у хлопчыкаў і дзяўчынак ёсць усе неабходныя рэчы.

— Ім купілі і абутак, і вопратку па сезоне. Дзяўчынкам нават футры перадалі, — працягвае суразмоўца. — Калі яны былі ў бальніцы, шмат рэчаў прынеслі туды, зараз нясуць у школу.

Былі тыя, хто вырашыў дапамагчы дзеткам грашыма. За гэтыя сродкі братам і сястрычкам купілі заплечнікі і канцылярскія прыналежнасці.

Пра сям'ю суседзі кажуць - звычайная. Мама, распавядаюць, за дзецьмі глядзела. Тата — у турме. Родныя бацькі жывуць у Быхаўскім раёне. З блізкіх у Пухавіцкім раёне — бацькі мамы. Бабуля працуе ў сталовай.

Для пражывання ўнукаў дом дзядулі і бабулі не падыходзіць, таму дзецям ужо знайшлі двухпавярховы катэдж у «SOS - Дзіцячай вёсцы» ў Мар'інай Горцы. Выхоўваць іх будзе педагог.

— Катэдж знаходзіцца прыкладна ў двух кіламетрах ад аграгарадка, дзе жывуць бабуля і дзядуля, - кажа Алена Шастакова. - У любы момант родныя змогуць да іх прыязджаць, наведваць дзяцей і дапамагаць выхавальніку.

Цяпер з дзецьмі працуюць псіхолагі.

Што стала прычынай пажару пакуль высвятляецца. Адна з версій — неасцярожнае абыходжанне з агнём пры распальванні печы.

Хочаш падзяліцца важнай інфармацыяй ананімна і канфідэнцыйна?