newgrodno.by
Трое жыхароў Гродна — 30-гадовы мужчына і дзве 23-гадовыя сяброўкі — пілі ў кватэры па праспекце Янкі Купалы. Пасля застолля яны вырашылі адправіцца ў начны клуб на таксі, выклікалі машыну і выйшлі чакаць яе на вуліцу. Неўзабаве аўтамабіль з'явіўся ў двары, аднак, як пазней высветлілася, гэта было не іх таксі. У салоне знаходзіліся дзве пасажыркі, якія накіроўваліся дадому, а кіроўца ж папросту пераблытаў паварот, паведамляе абласная міліцыя.
Падпітая кампанія не хацела верыць у такое развіццё падзей, хлопец і дзве дзяўчыны сталі настойваць на тым, што гэта іх машына. У выніку адбыўся канфлікт: пакуль мужчына размаўляў з кіроўцам, дзве дзяўчыны сталі разбірацца з пасажыркамі.
31-гадовая і 23-гадовая пасажыркі спрабавалі растлумачыць, што яны селі ў таксі ў іншым канцы горада і едуць дадому, але іх апаненткі адмаўляліся весці дыялог. У выніку яны выцягнулі дзяўчат з салона і сталі іх збіваць. Пазней тройца падазраваных схавалася ў дварах, а пацярпелыя звярнуліся па дапамогу ў міліцыю.
У выніку праведзеных аператыўна-вышуковых мерапрыемстваў усе трое былі затрыманыя. Пацярпелыя, на шчасце, сур'ёзных траўмаў не атрымалі.
