15:50
Людзі праспявалі «Магутны Божа», Павел Севярынец ізноў звяртаецца да прысутных. Акцыя заканчваецца
15:31
Людзей паменела, мітынг заканчваецца. Шэсця, па словах Севярынца, сёння не плануецца
15:20
На плошчы асабліва нічога не адбываецца. Хто хоча, той падыходзіць да мікрафона і выступае. Выступае брат лідара Дзяніса Урбановіча (кіраўніка «МФ») Максім.
На плошчы каля 200 чалавек.
15:05
«Незалежнасць, незалежнасць», — гукаюць людзі.
15:02
Зноў выступае Павел Севярынец, ён кажа, што 26 снежня на нарадзе кіраўнікоў апазіцыі будзе вырашацца, што рабіць далей з пратэстамі. Алесь Чахольскі дадае, што трэба быць гатовым у любы дзень выходзіць на абарону радзімы.
14:52
Выступае адзін з кіраўнікоў КХП-БНФ Алесь Чахольскі. Таксама вельмі крытычна выступае супраць інтэграцыі з Расіяй.
За ім выступае Вячаслаў Сіўчык. Ён кажа: «Я веру ў беларускую моладзь, за ёй будучыня»
Сёння народу значна меней, чым учора і чым 7 снежня.
З'явіўся, здаецца, учорашні «Дзед Мароз». Людзі кінуліся да яго, ён адышоў, раіцца з міліцыяй, што рабіць.
14:45
Выступае грамадская актывістка Алена Талстая.
14:39
Калонкі каля ёлкі ўжо рыпяць, так іх на максімум уключылі, каб не было чуваць прамоўцаў
14:36
«Шлі б вы дадому са сваёй саюзнай дзяржавай», — кажа яму нейкі дзядзька. А ён адказвае, што Беларусь прырасце новымі тэрыторыямі.
14:31
Вельмі шмат моладзі, прычым людзей узросту да 18 гадоў. Яны хаваюць твары за шалікамі, бо супрацоўнікі ў цывільным нахабна іх фатаграфуюць проста ў твар.
14:27
Людзі стаяць на Кастрычніцкай з боку вуліцы Энгельса. Там каля 250 чалавек. Эксперты мяркуюць, што невялікая колькасць тлумачыцца тым, што людзі рэагуюць на знешнія падзеі. Паколькі ўчора Лукашэнка і Пуцін не дамовіліся па прынцыповых пытаннях, таму і патрэбы выходзіць асаблівай няма.
14:20
Севярынец зачытаў некалькі параграфаў Канстытуцыі, перадаў слова намесніку старшыні КХП БНФ Юрасю Беленькаму. Ён вельмі палымяна выступае: «Спыніцеся [рабіць інтэграцыю]»
14:15
Людзі рушылі да левага боку прыступак Палаца Рэспублікі, каб не замінаць дзецям з бацькамі, што ідуць у будынак на свята. На акцыі ўжо каля 200 чалавек.
Выступае Севярынец: «Свабоду Вінярскаму, Афнагелю, палітвязням»
14:10
Людзі спяваюць «Пагоню»
14:10
Прыйшоў на плошчу Уладзімір Някляеў. Людзі пратэстуюць супраць знявагі, кажа ён. Ён дадае, што яго шакавалі прызнанні Юрыя Гараўскага, які прызнаўся ў саўдзеле да знікненняў Ганчара, Красоўскага, Захаранкі.
Таксама дадае, што перамовы Лукашэнкі і Пуціна падобныя да выпрошвання падачак. «Нельга браць падачкі».
Някляеў у лёгкай куртцы. «Вам не халодна?» — пытаюцца журналісты. «Гэта мая шчаслівая куртка», — адказвае ён.
14:07
Людзі дружна гукаюць: «Жыве Беларусь». Але на плошчы вельмі гучна грае дзіцячая музыка.
14:05
Міліцыянт падышоў і кажа, што акцыя несанкцыянаваная і трэба разысціся. Яго сустрэлі дружным свістам.
На плошчы некалькі дзясяткаў чалавек. Яны ў асноўным гуртуюцца каля праспекта. Нейкі мужчына зазначае, што страшна: «Але што зробіш, трэба ж камусьці бараніць незалежнасць».
14:01
Павел Севярынец кажа, што пра план акцыі будзе сказана пазней. «Акцыі будуць доўжыцца далей», — кажа ён. Павел адзначае, што ў чацвер будзе нарада кіраўнікоў апазіцыі, каб вырашыць, што далей рабіць. «Будзе мазгавы штурм на некалькі гадзін». Ён вельмі негатыўна ацэньвае ўчорашнія перамовы Лукашэнкі і Пуціна. «28 падпісаных дарожных карт — гэта паглынанне Беларусі», — кажа ён.
13:59
Людзі паціху падцягваюцца. Праўда, нямала людзей з навушнікамі, у цывільным, а таксама журналістаў.
13:55
На плошчы ўжо некалькі дзясяткаў чалавек, некалькі сцягоў.
Прыйшлі кіраўнікі КХП БНФ Юрась Беленькі і Алесь Чахольскі. Мастак Алесь Марачкін. Кажа, у міліцыю не пайшоў прынцыпова.
13:50
На Кастрычніцкай плошчы грае музыка, ходзяць бацькі з дзецьмі: у Палацы Рэспублікі і Палацы прафсаюзаў ідуць святочныя мерапрыемствы. Аднак ужо падцягваюцца ўдзельнікі пратэсту. Пакуль іх некалькі чалавек.
13:45
На Кастрычніцкую плошчу ўжо прыйшоў Павел Севярынец. Ён кажа, што акцыю будуць ладзіць Дэпутаты незалежнасці, а таксама сябры КХП — БНФ.
«Лукашэнка ў пастцы», — каментуе Севярынец учорашнія перамовы Пуціна і Лукашэнкі і заклікае рыхтавацца да акцый у святочныя дні.
Папярэднія акцыі прайшлі 7 і 8 снежня, тады, 7 снежня, Лукашэнка сустракаўся ў Сочы з Пуціным, каб абмеркаваць дарожныя акцыі інтэграцыі. Учора, 20 снежня, калі Лукашэнка сустракаўся з Пуціным у Пецярбургу, прайшла чарговая акцыя пратэсту, прычым яна была больш масавая. Яе ўдзельнікі, сабрашыўся на Кастрычніцкай плошчы, прайшлі шэсцем да Плошчы Незалежнасці, а затым Нямігай да Зыбіцкай.
Трэба таксама ўлічыць, што напярэдадні акцыі міліцыя папярэдзіла дзясяткі патэнцыйных удзельнікаў аб недапушчальнасці ўдзелу ў мерапрыемствах, а дзяржСМІ разгарнулі контрпрапаганду дыскрэдытацыі.
У Мінску зноў пратэставалі супраць інтэграцыі з Расіяй ФОТЫ, ВІДЭА
