У Мінску паставяць амаль 500 «Табакерак». Стала вядома, колькі яны будуць плаціць за арэнду зямлі

Кіёскі «Табакерка» пачалі з'яўляцца ў Мінску летам, але пакуль большасць з іх не працуе. Згодна з загадам прэзідэнта, мясцовыя ўлады абавязаны прадастаўляць кампаніі «Энерга-Оіл» бізнэсоўца Аляксея Алексіна зямельныя ўчасткі для размяшчэння гэтых шапікаў без аўкцыёнаў. Але гэта зусім не значыць, што інвестар вызвалены ад далейшай арэнднай платы.

Павялічыць

Колькі мінімум будзе плаціць «Табакерка»?

Як стала вядома tut.by, у Мінску яна складае 6 базавых арэндных велічынь, або 101,4 рубля за квадратны метр у месяц. Паколькі плошча «Табакеркі» складае мінімум 6,25 квадратнага метра, то за ўвесь шапік у месяц выходзіць мінімум 633,75 рубля, або каля 300 даляраў па актуальным курсе.

Паводле інфармацыі партала, усе зямельныя ўчасткі для размяшчэння «Табакерак» у Мінску ўжо выдзеленыя — іх каля 470. А гэта значыць, што ў месяц яны ў сукупнасці павінны даваць мінімум 297,8 тысячы рублёў, або каля 140,5 тысячы даляраў арэнднай платы. За год выходзіць каля 1,7 мільёна даляраў.

А каму будзе плаціць «Табакерка»?

Важны нюанс яшчэ ў тым, што арэндная плата пералічваецца той арганізацыі, у якой у карыстанні знаходзіцца зямельны ўчастак, і толькі 25% ад гэтай сумы потым ідзе ў бюджэт сталіцы. Гэта значыць, у год бюджэт атрымае мінімум 425 тысяч долараў.

Паколькі шмат «Табакерак» стаіць на ходніках ля праезнай часткі, то нескладана здагадацца, што адным з найбуйнейшых атрымальнікаў арэнднай платы ад «Энерга-Оіл» будзе «Гаррамаўтадар Мінгарвыканкама».

Нагадаем, «Энерга-Оіл» рэалізуе інвестпраект па стварэнні недзяржаўнай сеткі па гандлі тытунёвымі вырабамі, таму па ўсёй краіне і з'яўляюцца «Табакеркі». У рэгіёнах працэс ідзе яшчэ з канца 2018 года. 

Мінгарвыканкам хоць і пайшоў на ўстаноўку шапікаў, але паставіў «Энерга-Оіл» некалькі ўмоў. Па-першае, частка кіёскаў у сталіцы павінна быць выканана ў іншым, больш прэзентабельным дызайне. Па-другое, кіёскі «Табакерка» забаронена размяшчаць унутры гарадскога ядра, а таксама на тэрыторыях, прылеглых да магістральных вуліц, установаў аховы здароўя, адукацыі, у парках і скверах. Але паколькі фармальна гэтая забарона нідзе не замацаваная, гэтае правіла парушаецца.

Плануецца, што ў кіёсках тытунёвыя вырабы будуць займаць 80% асартыменту. Астатнія 20% — іншыя тавары.

Таму ў «Табакерках» таксама прадаюць чыпсы, арэшкі, жуйкі, прэзерватывы, шакаладкі, каву і іншае. Увогуле, усё тое, што было ў звычайных шапіках, якія ў 2008 годзе прыбралі з вуліц Мінска.

• 0
• 0
• 0
• 0
• 0
• 0
• 0
• 0