Чатырнаццацігадовая беларуска Ліза Міснікава выступіла ў польскім тэлешоу The Voice Kids. Яна праспявала песню Арыяны Грандэ Break Free і развярнула крэслы дваіх трэнераў: дуэта Tomson&Baron і Cleo, адзначае sb.by.

Аказалася, прадстаўніца нашай краіны на дзіцячым конкурсе песні «Еўрабачанне-2019» вельмі любіць Польшчу, да таго ж, у яе ёсць польскія карані. Мама дзяўчынкі Таццяна ў інтэрв'ю тэлеканалу TVP 2 распавяла:

— Мае бабуля і дзядуля былі палякамі і да 1939 года жылі на тэрыторыі, якая спачатку належала Польшчы, а потым стала беларускай. Неяк мы прыехалі ў Варшаву, і Ліза сказала: «Мам, а ў Польшчы таксама нешта ёсць «Голас. Дзеці» — давай паспрабуем».

Перад выхадам на сцэну Лізавета прызналася, што вельмі любіць Варшаву:

— Мне лягчэй размаўляць па-руску, але цяпер стараюся вывучыць польскую. Калі ў мяне пытаюцца, хто я па нацыянальнасці, заўсёды кажу: беларуска і трохі полька. Я вельмі часта прыязджаю сюды, люблю хадзіць па прыгожых вуліцах.

Пасля нядоўгіх роздумаў беларуская вакалістка вырашыла далучыцца да каманды Tomson&Baron. За кадрам яны распавялі:

— Ліза — прыклад таго, што польскі The Voice Kids не мае тэрытарыяльных межаў.

Польскі The Voice Kids транслюецца на тэлеканале TVP 2 ужо трэці год. У гэтым сезоне крэслы трэнераў занялі спявак Давід Квяткоўскі, спявачка Cleo і дуэт Tomson&Baron.