Сёння сусветная супольнасць аддае даніну памяці ахвярам Халакосту. Дата прымеркавана да гадавіны вызвалення войскамі Чырвонай Арміі ў 1945 годзе нацысцкага лагера смерці «Аўшвіц-Біркенаў» — найбуйнейшага комплексу канцэнтрацыйных лагераў на тэрыторыі акупаванай Еўропы. Тут было закатавана больш за 1 мільён чалавек.
27 студзеня як Міжнародны дзень памяці ахвяр Халакосту заснаваны ў 2005 годзе рэзалюцыяй Генасамблеі ААН.
Халакост і нацысцкі лагер смерці «Аўшвіц-Біркенаў» сталі аднымі з самых трагічных старонак гісторыі Беларусі і яе народа, які страціў за гады Другой сусветнай вайны кожнага трэцяга. Сярод загінулых — 700 тысяч яўрэяў, якія пражывалі на тэрыторыі Беларусі. У Мінску нацысты стварылі трэцяе па велічыні гета для знішчэння яўрэяў на тэрыторыі акупаванай Еўропы. У «Аўшвіц-Біркенаў» знаходзіліся тысячы зняволеных беларусаў (і гэта без уліку беларускіх яўрэяў, палякаў, цыганоў). У лагер было дастаўлена больш за тысячу беларускіх дзяцей, нагадвае МЗС.
