29.01.2020 / 07:41

У Facebook расказалі, як збіраюць звесткі пра карыстальнікаў

Амерыканская кампанія Facebook паведаміла, што займалася зборам звестак аб актыўнасці сваіх карыстальнікаў на сайтах, якія выкарыстоўваюць інструменты Facebook для бізнэсу, піша tass.ru.

Кампанія паведаміла, што аналізуе «дзеянні па-за Facebook» для персаналізацыі кантэнту, які атрымліваюць карыстальнікі сеткі. «Дзеянні па-за Facebook ўключаюць ваша ўзаемадзеянне з кампаніямі і арганізацыямі, пра які яны нам паведамляюць», — гаворыцца ў заяве. Як сцвярджае даведачны цэнтр Facebook, карпарацыя аналізуе звесткі аб адкрыцці дадаткаў або ўваходзе ў іх праз Facebook, аб праглядзе кантэнту, пошуку тавару, яго дадаванні ў кошык і набыцці, а таксама аб здзяйсненні ахвяраванняў.

У Facebook сцвярджаюць, што цяпер карыстальнікі змогуць кіраваць інфармацыяй, якая даецца кампаніі для аналізу. У прыватнасці, з'явіцца функцыя «ачысціць гісторыю», якая дазваляе ўладальніку акаўнта ажыццявіць «адключэнне фіксацыі дзеянняў па-за Facebook». Паводле інфармацыі газеты The Washington Post, гэтая функцыя будзе падобная з функцыяй выдалення гісторыі інтэрнэт-браўзэра. Яна дазволіць выдаліць інфармацыю пра наведванне сайтаў, але не абмяжуе кампанію ў далейшым адсочванні актыўнасці карыстальніка.

Газета таксама паведаміла, што Facebook збірала звесткі, якія тычацца асабістага жыцця карыстальнікаў, у тым ліку інфармацыю аб наведванні ў інтэрнэце старонак медыцынскіх кампаній, страхавых агенцтваў і бюро крэдытных гісторый.

NN.by

Каб пакінуць каментар, калі ласка, актывуйце JavaScript у наладах свайго браўзеру