04.02.2020 / 11:28

Глеб Лабадзенка — каментатарам: Давайце спачатку пераможам, а потым будзем мову ад шурпатасцяў вылізваць 35

Папулярызатар беларускай мовы Глеб Лабадзенка рэзка выказаўся супраць моўнага крытыканства ў інтэрнэце. 

Часам трапляюцца на вочы дыскусіі выбітных мовазнаўцаў, байцоў каментатарскага фронту: тое слова чалавек не так напісаў, тут не тая літара стаіць.

За апошнія тыдні — адразу два прыклады.

Жыхар Беразіна Віктар Цыркуновіч адкрыў салон тату. Назваў яго «1863», бахнуў партрэт Кастуся на ўсю сцяну, а на дзвярах напісаў «Зніжкі за мову». Якая рэакцыя нармалёвага чалавека? Сказаць: «Спадар Віктар, вы малойца, дзякуй вам за пашырэнне беларускай мовы ў публічнай прасторы!»

Другі прыклад. Добры хлопец Мікола, гадаванец курсаў «Мова Нанова», ставіць пластыкавыя вокны і дзверы. Вядзе бізнэс па-беларуску, абклеіў адпаведна сваю машыну. Крыху накасячыў з арфаграфіяй. Але якая рэакцыя нармалёвага чалавека? Сказаць: «Мікола, ну ты малаток, што лупіш па-беларуску, давай замоўлю ў цябе акно!»

Што робяць тыя, каму няма чым заняцца? Пачынаюць гнюсіць на чым свет стаіць гэтых людзей, цкаваць за памылкі, перамываць косткі — адбіваюць увогуле жаданне пісаць нешта па-беларуску. Святыя людзі, якія самі памылак не робяць!

Шаноўныя Мікола і Віктар! Нікога не слухайце! Паклон вам за тое, што любіце нашую родную мову не ў інтэрнэт-баталіях, а ў рэальным жыцці! Заклікаю ўсіх падтрымліваць кожнага чалавека, хто робіць хоць бы крок у бок беларускай мовы і беларушчыны! Дзякаваць за гэта — і заахвочваць рублём, набываючы нешта.

Бо задача № 1 на сёння ў справе беларускай мовы — папулярызацыя і пашырэнне яе ўжывання, з памылкамі і без памылак, з калькамі і без калек, з мяккімі знакамі і без мяккіх знакаў, з русізмамі і паланізмамі, з трасяначкай ці без трасяначкі. Чапляючыся да выразаў кшталту «зніжкі за мову», далёка пойдзем, ну.

Давайце спачатку пераможам, а потым будзем мову ад шурпатасцяў вылізваць. Бо пакуль што мы асфальтуем дзіркі на пяску, а трэба ўзяць — і заасфальтаваць усю дарогу.

Хочаш падзяліцца важнай інфармацыяй ананімна і канфідэнцыйна?

NN.by

21
Бел / Адказаць
04.02.2020 / 11:34
Малайчына, Глеб.

Бо калі нехта спрабуе размаўляць ці пісаць па-беларуску, але робіць памылкі, а потым вылазіць нейкі "знаўца" і крычыць "ты тут памылку зрабіў", "такога слова па-беларуску няма", "што ты за беларус, калі так кепска ведаеш мову", то толькі адпадае жаданне нешта рабіць па-беларуску!
15
Kent / Адказаць
04.02.2020 / 11:35
Слушна!
17
Ліцьвін металіст / Адказаць
04.02.2020 / 11:38
Слушна сказаў!
Паказаць усе каментары/ 35 /
Каб пакінуць каментар, калі ласка, актывуйце JavaScript у наладах свайго браўзеру