У жыхара Баранавіч скралі сямейную рэліквію — каштоўную манету царскай чаканкі з выявай цара Мікалая II, якая дасталася яму ад дзеда. Пра наяўнасць такой у пацярпелага ведалі нямногія, паведамляе міліцыя.
Аператыўнікі вызначылі кола падазраваных, туды патрапіла былая жонка пацярпелага: сямейная пара доўгі час жыла разам, пакуль жанчына не пачала злоўжываць спіртным, з-за чаго потым страціла працу. Пасля разводу экс-муж і жонка засталіся пад адным дахам, але свой пакой мужчына замыкаў на ключ.
Са слоў аператыўнікаў, гаспадар кватэры неаднаразова заяўляў у міліцыю пра крадзяжы свайго заручальнага пярсцёнка, аднак штораз жанчына паспявала выкупіць яго з ламбарда. У выпадку з манетай такая схема не прайшла: сямейную каштоўнасць жанчына прадала мясцоваму калекцыянеру, але прадала яе мінімум у 4 разы танней — нумізматы ацэньваюць рэдкую манету ў 800 рублёў.
Завялі крымінальную справу за крадзеж.