«Дакладна‑не‑Абрамовіч» вывеў футбольны клуб роднай вёскі ў лідэры Бундэслігі
Калі Дытмар Гоп прыйшоў да дабрабыту, ён пачаў спансараваць спорт. У яго была дзяцінная і нерэальная, як на першы погляд, ідэя.
Сапраўднае яго імя Дытмар Гоп. Ён кампутарны мільярдэр, але ягонае імя грыміць у Германіі з другой прычыны: спадар Гоп паламаў статус‑кво айчыннага футбольнага свету.
Who is Who
Дытмар Гоп сваім прозвішчам адпавядае жыццёваму наробку.
69‑гадовы працаголік вырас у вёсцы Гофэнхайм, што паміж Гайдэльбергам і Гайльбронам.
Гуляў у лініі нападзення мясцовага аматарскага футбольнага клубу, у гульні, паводле сведчанняў адналетак, ішоў на поўную рызыку і выкладваўся да канца. Тое ўсталяваў сабе за правіла і па‑за стадыёнам.
Вырашыў атрымаць вышэйшую адукацыю. Прадаваў цукровыя буракі, збіраў слімакоў для рэстаранаў і за гэта аплачваў вучобу ва ўніверсітэце.
Вывучыўся інфарматыцы і ў 32 гады заснаваў сваю фірму SAP (Business Software Solutions Applications and Service – Праграмнае забяспечанне, перыферыя і сервіс для бізнэсу). На сёння ў фірме 50 тысячаў супрацоўнікаў. Гоп!
Калі Дытмар Гоп прыйшоў да дабрабыту, пачаў спансараваць спорт. Дваццаць гадоў таму назад узяўся за дзяцінную і нерэальную, як на першы погляд, ідэю: вывесці футбольны клуб роднай вёскі ў Бундэслігу.
Гляньце цяпер на турнірную табліцу: ці ёсць там Гофэнхайм? Ёсць! І дзе? А наверсе табліцы, хурды‑мурды! І яшчэ раз Гоп.
Восеньскі малы чэмпіянат 2008 года клуб наогул завяршыў на першым месцы!
Сказаў «гоп» – а як пераскочыў?
Тэхнічна Дытмар Гоп зрабіў гэта так. Ён перанёс прынцыпы пабудовы свайго бізнэсу на гэтую новую дзялянку.
Памяняў аматарскія структуры спартовага клуба на прафесійныя, запрасіў у сваю вёску найлепшых трэнераў. Паўсюль у акрузе заснаваныя былі падлеткавыя фарм‑клубы, прычым так, што ў школе клубу перспектыўныя маладыя футбалісты могуць атрымаць таксама і базавую гімназічную альбо прафесійную адукацыю – хто да чога прыдатны.У 2008 годзе Нямецкі футбольны звяз надаў Гофэнхайму годнасць элітнай школы футболу. Галоўны адмысловец поспеху трэнер Ральф Рангнік ў гэтым сама годзе заявіў, што не будзе заключаць кантракт з гульцамі, старэйшымі за 25 гадоў.
Яшчэ адна адметнасць: з падачы Нямецкага футбольнага звязу, у супрацы з журналістамі, за Дытмарам Гопам замацавалася азначэнне «Дакладна‑не‑Абрамовіч».
Дытмар Гоп уклаў у клуб і яго інфраструктуру больш за 100 мільёнаў еўра.
У 2010 годзе ён плануе здаць у эксплуатацыю «Райн‑Нэкар‑стадыён» для свайго вясковага клубу каля аўтабану А6 (дзеля лепшага даезду) на 30 тысячаў наведвальнікаў. І нават тут спадар Гоп застаецца бізнэсоўцам, бо пралічыў, што стадыён будзе ўтрымліваць сябе сам – будзе самаакупным.
Цяпер чытаюць
Стала вядома, што за 200 тысяч еўра прапаноўвалі Сяргею Ціханоўскаму «беларускія бізнэсмены»29
Каментары