Першы выпадак смерці чалавека, які заразіўся каранавірусам COVID-19, зафіксаваны ў Паўднёвай Карэі. Пра гэта паведамілі ўлады краіны.
Памерлы пацыент праходзіў лячэнне ад пнеўманіі ў бальніцы горада Чхандо на поўдні краіны. Наяўнасць у яго каранавіруса была пацверджана пасля таго, як ён памёр. Пры гэтым непасрэдная прычына смерці не паведамляецца.
За адзін дзень колькасць пацверджаных выпадкаў заражэння ў Паўднёвай Карэі вырасла адразу на 53, а агульная колькасць склала 104. Пры гэтым большасць новых хворых выявілі ў горадзе Тэгу на поўдні. Мэр населенага пункта заклікаў грамадзян па магчымасці ўстрымацца ад выхаду на вуліцу.
Таксама паведамляецца, што каля 40 чалавек, як мяркуецца, заразіліся ад аднаго захварэлага — 61-гадовай карэянкі. Усе яны наведвалі адну царкву.
