21.02.2020 / 14:16

Ва ўсіх абласных цэнтрах краіны з’явіцца серыя арт-інсталяцый «Мова» ФОТЫ 11

У Міжнародны дзень роднай мовы, 21 лютага, кампанія А1 прадставіла новы праект, дзякуючы якому ў рамках ініцыятывы «Веліч роднай мовы» вясной 2020 года ў Мінску і найбуйнейшых гарадах Беларусі — Брэсце, Віцебску, Гродне, Гомелі і Магілёве — з’явіцца серыя незвычайных мастацкіх інсталяцый. Гэта будуць наборы інтэрактыўных скульптур, якія разам утвараюць слова «МОВА».

Манументальныя тэкставыя інсталяцыі стануць месцамі камфортнага адпачынку, бо фактычна ўяўляюць з сябе вулічную мэблю, вырабленую з дрэва і металу. Аўтар арт-аб’ектаў — вядомы беларускі скульптар Павел Вайніцкі. Па яго задуме, «МОВА» служыць месцам камунікацыі, дзе людзі могуць сустракацца і зручна размяшчацца на скульптурных літарах.

Лакальныя асаблівасці кожнага з шасці рэгіёнаў будуць паказаныя праз колер інсталяцый — ідэя праекта базіруецца на канцэпцыі нацыянальных колеравых упадабанняў, распрацаванай выдатным дызайнерам, мастаком і паэтам Міхалам Анемпадыставым у кнізе «Колер Беларусі», а таксама на даследаваннях найбуйнейшага беларускага этнографа Міхаіла Раманюка, які рэканструяваў колеры традыцыйных народных строяў розных рэгіёнаў Беларусі.

Паколькі Мінск — геаграфічны, сацыяльны і культурны цэнтр краіны, дзе перамяшаныя асаблівасці ўсіх рэгіёнаў, гэта будзе адлюстравана з дапамогай усіх асноўных колераў, якія характарызуюць нашу краіну, — сіняга, зялёнага, жоўтага, чырвонага і чорнага. Месца размяшчэння інсталяцыі ў сталіцы яшчэ ўдакладняецца.

Ва ўсіх гарадах арт-аб’екты з’явяцца ўвесну.

 

Хочаш падзяліцца важнай інфармацыяй ананімна і канфідэнцыйна?

NN.by

16
Медны канцлер / Адказаць
21.02.2020 / 14:42
Трындзец яны, канешне, нязграбныя ды пачварныя знешне. Нехта адчыніў Word Art ды адчуў сябе дызайнерам. І якая з іх мэбля, дзе сядзець? На 45° «М» ці малюткім псеўда-крэсле «О»? І навошта сядзець дупай на мове? Імпэт добры, але рэалізацыя – абарані Бог.
9
Кажыма праўду / Адказаць
21.02.2020 / 15:24
Вітаем мяккую беларусізацыю!

Стагоддзямі зацятага змагання беларусы дамагаліся свае Беларускае Дзяржавы, каб самім распараджацца ўласным лёсам. Застаўся апошні рывок, апошняе намаганне, каб давершыць Дзядоўскую Справу.

Сумленныя беларусы, усе на абарону Вольнай Краіны! Масавы ўдзел у выбарчай кампаніі 2020 станецца сакрушальным таранам супраць беларусафобскіх сіл – варожай перашкоды на шляху да Нацыянальнай Дзяржавы.

Жыве Беларусь! – спадкаемца старажытнай Русі і цэнтр гістарычна-ісціннага «рускага свету».
5
Ліцьвін металіст / Адказаць
21.02.2020 / 15:58
Гэта зьдзек, мова выціскаецца адусюль, рэальна не выкарыстоўваецца, ужытак яе не пашыраецца, а наадварот імкнуцца штучна звузіць, а тут як плявок нейкі паставяць гаргары нават няведаю як іх яшчэ назваць...
Паказаць усе каментары/ 11 /
Каб пакінуць каментар, калі ласка, актывуйце JavaScript у наладах свайго браўзеру