25.02.2020 / 18:10

У сакавіку на два дні зачыняць шэсць станцый метро. Як людзі будуць дабірацца?

Частка другой лініі метро ад «Фрунзенскай» да «Каменнай Горкі» могуць закрыць на два дні ў сакавіку. Гэта трэба для будаўніцтва прымыкання трэцяй лініі. У арганізацыі «Сталічны транспарт і сувязь» tut.by распавялі, як можна кампенсаваць закрыццё шасці станцый падземкі.

Цяпер «Мінскметрабуд» называе такія дні закрыцця шасці станцый мінскага метро — выхадныя 21 і 22 сакавіка.

— Але гэтыя даты пакуль не ўзгодненыя, рашэнне Мінгарвыканкама па гэтым пытанні яшчэ не падпісана, — тлумачыць намеснік начальніка аддзела арганізацыі пасажырскіх перавозак ГУ «Сталічны транспарт і сувязь» Аляксей Касінскі. 

Таму транспартнікі пакуль гавораць толькі пра прыблізныя планы па кампенсацыйных наземных маршрутах.

— Як мяркуецца, будуць два часовыя маршруты па Прытыцкага, што дублююць метро — ад станцыі «Фрунзенская» да «Каменнай Горкі». Адзін — хуткасны аўтобусны з прыпынкамі толькі каля станцый метро. Другі — тралейбусны, які будзе ісці з усімі прыпынкамі, — кажа Аляксей Касінскі.

Часовыя маршруты будуць рухацца з інтэрваламі ў дзве-тры хвіліны. Дублюючы транспарт будзе працаваць з 5.30 да 1.00, згодна з рэжымам метро.

Акрамя арганізацыі двух часовых маршрутаў да «Фрунзенскай», транспартнікі паспрабуюць адцягнуць пасажыраў на іншыя станцыі метро.

Аляксей Касінскі дадае, што наземны транспарт можа справіцца з кампенсацыяй закрытых станцый метро менавіта ў выходныя.

— Цягнік метро месціць тысячу чалавек, каб замяніць адзін такі састаў, трэба шэсць-сем састаўных аўтобусаў і тралейбусаў. Таму ў будні, калі метро перавозіць да 30 тысяч чалавек у гадзіну, наземны транспарт фізічна не здужае такую плынь. Але ў выходны дзень на гэтым участку лініі перамяшчаюцца парадку 6 тысяч пасажыраў у гадзіну, — тады наземны транспарт, вядома, справіцца з нагрузкай.

Хочаш падзяліцца важнай інфармацыяй ананімна і канфідэнцыйна?

NN.by

Каб пакінуць каментар, калі ласка, актывуйце JavaScript у наладах свайго браўзеру