27.02.2020 / 11:03

На Астравеччыне жонка заявіла ў міліцыю на мужа, бо той прачытаў яе перапіску ў сацсетках

Крымінальная гісторыя з удзелам сямейнай пары адбылася ў студзені ў адным з пасёлкаў Астравецкага раёна. У міліцыю звярнулася 42-гадовая жанчына са скаргай на свайго мужа: той незаконна атрымаў пароль да яе акаўнта ў сацсетцы і прачытаў перапіску, паведамляе прэс-служба МУС.

Высветлілася, што муж і жонка разышліся, аднак без афіцыйнага скасавання шлюбу. У 38-гадовага мужа застаўся агульны планшэт, у якім ён знайшоў старонку жонкі ў адной з сацыяльных сетак і вырашыў прачытаць яе перапіску.

— Мужчына незаконна атрымаў пароль, увайшоў ад імя жонкі на старонку і вывучыў яе перапіску. У наступным ён змяніў яе ўліковыя даныя і падзяліўся паведамленнямі, якія кампраметуюць жонку, з агульнай знаёмай. Са слоў падазраванага, ён пайшоў на злачынства з цікаўнасці: хацеў даведацца, ці не здраджвала яму жонка, — распавялі ў Астравецкім РАУС.

Дзеянням мужчыны следчыя далі прававую ацэнку. Па факце несанкцыянаванага доступу да камп’ютарнай інфармацыі ўзбудзілі крымінальную справу.

Раней мужчына не судзімы, аднак прыцягваўся да адміністрацыйнай адказнасці за розныя правапарушэнні.

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру