Удары па ваенных пазіцыях Турцыі ў Ідлібе былі нанесены, нягледзячы на каардынацыю з расійскім бокам, якому Анкара загадзя паведаміла пра размяшчэнне Узброеных сіл Турцыі.
Пра гэта заявіла міністэрства абароны Турцыі, паведамляе Еўрапейская праўда са спасылкай на турэцкае дзяржаўнае агенцтва Anadolu.
У ноч на пятніцу ў сірыйскай правінцыі Ідліб ў выніку паветраных удараў войска прэзідэнта Сірыі Башара Асада і расійскіх войскаў загінулі па меншай меры 33 турэцкія салдаты.
«На момант авіяўдару па турэцкіх ваенных пазіцыях у Ідлібе ў сектары не было ўзброеных апазіцыйных груп», — заявіла міністэрства абароны Турцыі.
Па словах міністра Хулусі Акара, удары па турэцкіх ваенных пазіцыях у Ідлібе працягваліся, нягледзячы на папярэджанне Анкары. Удары наносіліся нават па вайсковых машынах хуткай дапамогі.
Паводле звестак Міністэрства абароны Турцыі, турэцкая армія знішчыла ў Ідлібе 5 верталётаў, 23 танкі, 23 гарматы і самаходкі, зенітна-ракетны комплекс SA-17, зенітна-ракетны комплекс SA-22 і нейтралізавала 309 прыхільнікаў Башара Асада.
«На фоне дыпламатычных і палітычных намаганняў па ўрэгуляванні сірыйскага канфлікту турэцкія вайскоўцы былі жорстка атакаваныя, на што будзе жорсткі адказ», — заявіў спікер турэцкага парламента Мустафа Шэнтоп.
Паветраны ўдар адбыўся пасля таго, як расійская дэлегацыя правяла два дні ў Анкары для перамоваў з турэцкімі чыноўнікамі наконт сітуацыі ў Ідлібе. Міністэрства абароны Расіі сцвярджае, што турэцкія войскі, якія патрапілі пад абстрэл сірыйскіх войскаў 27 лютага, уваходзілі ў лік баевікоў.
