РНК каранавіруса ў Беларусі выяўлены ў 27 чалавек, першыя трое выпісаныя. Ва ўстановах аховы здароўя 24 чалавекі, таксама застаюцца ва ўстановах аховы здароўя «кантакты першага ўзроўню», паведаміла Мінздароўя на брыфінгу ў Мінску.
7 захварэлых далі па 2-3 кантакты тых, хто заразіўся.
Адзін з захварэлых схаваў інфармацыю пра наведванне Паўночнай Італіі і своечасова не выклікаў хуткую дапамогу. Ён працягваў сустракацца з сябрамі і сваякамі, хадзіў на дні нараджэння і спартыўныя мерапрыемствы, сказала прадстаўнік Мінздароўя на брыфінгу 13 сакавіка.
У выніку прыйшлося шпіталізаваць 91 чалавека, якія кантактавалі з ім, у тым ліку яго сына, які, не ведаючы, што вірус перадаўся і яму, хадзіў на заняткі ва ўніверсітэт і перадаў вірус сваім аднагрупнікам [напэўна, маецца на ўвазе факультэт міжнародных адносін БДУ — НН].
Таксама ў Мінздароўі адзначылі, што дзеці і падлеткі лёгка пераносяць вірус, а ў зоне рызыкі знаходзяцца пажылыя людзі.
Афіцыйны прадстаўнік Сусветнай арганізацыі аховы здароўя сказаў, што чакаецца рост новых выпадкаў, гэта непазбежнасць працэсу.
У Беларусі зафіксавана 7 ачагоў каранавіруса.
