Міністэрства аховы здароўя апублікавала відэа пра прафілактыку інфікавання COVID-19.
Пералічваюцца шэсць пунктаў, якія павінен ведаць кожны.
Вірус распаўсюджваецца праз прамы кантакт. Гэта значыць трэба знаходзіцца як мінімум за метр ад чалавека, у якога ёсць сімптомы, каб знізіць рызыку заражэння. Сімптомы могуць уключаць гарачку, кашаль і задышку. У больш цяжкіх выпадках інфекцыя можа выклікаць пнеўманію. Найбольш хвароба пагражае пажылым людзям.
Неабходна часцей мыць рукі з мылам і вадой не менш за 20 секунд або апрацоўваць іх спіртазмяшчальнымі сродкамі. Пры кашлі або чханні трэба прыкрываць нос і рот локцем або папяровай сурвэткай.
Калі адсутнічаюць сімптомы хваробы, то няма неабходнасці насіць маску. Яе рэкамендуецца насіць людзям, якія кашляюць ці чхаюць — каб абараніць навакольных.
На гэты момант няма дастатковых даных аб тым, ці перадаецца вірус ад цяжарнай маці дзіцяці. Таксама на сёння няма лекаў ад інфекцыі і для яе прафілактыкі.
