Пасольства Беларусі ў Маскве адпрацоўвае механізм вывазу беларускіх грамадзян з РФ цягнікамі, аўтобусамі, не выключае і выкарыстанне асабістага аўтатранспарту, піша БелТА.
«Пасольства будзе аператыўна вырашаць пытанні з вывазам беларускіх грамадзян, зыходзячы з сітуацыі. Зараз мы адпрацоўваем алгарытм дастаўкі беларусаў дадому з выкарыстаннем чыгуначнага транспарту, аўтобусаў, у тым ліку транспарту амбасады, а таксама, магчыма, і асабістага аўтатранспарту грамадзян», — заявіў прэс-сакратар пасольства Алег Мазура.
Паводле яго слоў, расійскім бокам таксама прапрацоўваецца механізм арганізацыі магчымых чартарных авіярэйсаў.
Прэс-сакратар адзначыў, што ў сувязі са спыненнем Расіяй міжнароднага авіязлучэння скароціцца транзіт замежных грамадзян, у тым ліку беларусаў, праз Маскву. Разам з тым ён падкрэсліў, што ўсе беларусы, што прыбываюць сёння транзітам у Маскву з трэціх краін, у абавязковым парадку пры садзейнічанні пасольства будуць адпраўленыя дадому.
Як паведамлялася, прэм'ер РФ Міхаіл Мішусцін даручыў Расавіяцыі з 27 сакавіка спыніць рэгулярныя і чартарныя авіязносіны з расійскіх аэрапортаў у аэрапорты замежных дзяржаў і назад.
