30.03.2020 / 13:16

Жонка віцебскага артыста, які ў рэанімацыі з каранавірусам: Мы былі ў трох бальніцах, яны перапоўненыя 34

Віцебскі тэатр імя Якуба Коласа адмяняе спектаклі — у аднаго з артыстаў каранавірус, ён у рэанімацыі. «Наша Ніва» высветліла, што гэты артыст — 75-гадовы Віктар Дашкевіч.

Жонка Дашкевіча расказала «Нашай Ніве» пра яго хваробу. 

«Мы захварэлі на пнеўманію, і я, і муж. У паліклініцы зрабілі флюараграфію, рэнтген і пасля паставілі гэты дыягназ, — распавяла Святлана Мікалаеўна. — Нас накіравалі на шпіталізацыю. Мы спачатку пайшлі ў тубдыспансэр, але там было перапоўнена. Таму мы адпрасіліся дадому, дактары далі нам антыбіётыкі і адпусцілі.

Дома ў мужа паднялася тэмпература. Калі нас прыйшла праверыць дзяжурная доктарка, то сказала, што трэба неадкладна ехаць у бальніцу.

Нас накіравалі ў скурвендыспансэр, які цяпер абсталявалі пад пульманалогію.

Паклалі ў розныя палаты. Там узялі аналізы на каранавірус, але сказалі, што аналіз адмоўны.

Разам з мужам ляжаў мужчына, якога пасля забралі з бальніцы. Чаму, куды — ніхто нічога не сказаў. Пасля муж ляжаў з трыма мужчынамі.

Раптам 24 сакавіка мужа перавялі ў чыгуначную бальніцу, бо яму стала горш. І там узялі новы аналіз на каранавірус. 26 сакавіка стала вядома, што аналіз пазітыўны.

Я засталася ў скурвендыспансеры. Мяне выпісалі 26 сакавіка. У мяне паўторны аналіз не бралі, сказалі ізалявацца і быць дома 14 дзён. Дачка мне носіць прадукты, пакідае іх у пад’ездзе».

Святлана Мікалаеўна кажа, што не ведае, як Віктар Дашкевіч мог заразіцца. За мяжою ён не быў.

«10—11 сакавіка муж граў спектаклі, 18 сакавіка быў у тэатры таксама. Побач з мужам сядзеў мастацкі кіраўнік тэатра, а побач з мужам — расійскі рэжысёр Дольнікаў. Але ці муж заразіўся ад каго з іх, ці ад каго ў бальніцы, мы не ведаем. Цяпер мы ў тэатры стэлефаноўваемся, правяраем здароўе адно аднаго. Дактары кажуць, што калі апошні раз муж быў у тэатры 18 сакавіка, то да 1 красавіка сімптомы могуць праявіцца ў кагосьці з калег, — кажа Святлана Мікалаеўна.

— Сёння муж у рэанімацыі, на штучнай вентыляцыі лёгкіх. Калі яго паклалі пад апарат, яму спачатку стала лепей, а пасля праявілася ліхаманка. Яе знялі. І цяпер за 6 дзён ніякіх пазітыўных рухаў няма. Кажуць — стан цяжкі, але стабільны, усё.

У мужа ёсць захворванне — хранічная абструктыўная хвароба лёгкіх. Гэта ўскладняе сітуацыю. Знаёмыя дактары кажуць, што ён выкараскаецца, але што там будзе па выніку, хто яго ведае».

Па яе словах, сем артыстаў тэатра знаходзяцца ў бальніцы. У пяці з іх пнеўманія.

 ***

Віктар Дашкевіч

Нарадзіўся 3 студзеня 1945 ў вёсцы Вяціцераўка Чашніцкага раёна Віцебскай вобласці. Навучаўся ў Беларускім дзяржаўным тэатральна-мастацкім інстытуце, працаваў у Нацыянальным акадэмічным драматычным тэатры імя Якуба Коласа, быў дырэктарам Беларускага тэатра «Лялька» (Віцебск). З 1981 па 1990 год, з 1991 па 2007 год выконваў абавязкі загадчыка трупай тэатра імя Якуба Коласа.

Заслужаны артыст Беларусі, узнагароджаны медалём Скарыны.

УШ

Хочаш падзяліцца важнай інфармацыяй ананімна і канфідэнцыйна?

8
Васіль / Адказаць
30.03.2020 / 13:23
Няма слоў. 
4
Бел / Адказаць
30.03.2020 / 13:23
Людзі, расказвайце пра свае выпадкі пнеўманіі(калі вам адмаўляюцца рабіць аналіз на каранавірус), пра свае выпалкі каранавірусу!

Трэба, каб беларусы ведалі пра рэальны масштаб распаўсюджвання заразы ў Беларусі!!!
7
Бел / Адказаць
30.03.2020 / 13:26
Актор, які цяпер знаходзіцца ў цяжкім стане з пацьверджаным дыягназам COVID-19, 10 і 11 сакавіка працаваў у спэктаклі «Кот у ботах», 18 сакавіка таксама кантактаваў з калектывам тэатру.

«Кот у ботах» - гэта ж дзіцячы спектакль, на ім маглі дзяцей заразіць, зараз дзеці вырнуцца з канікул і заразяць настаўнікаў і пойдзе-паедзе...

Трэба канікулы працягнуць на тыдзень ці нават больш!
Паказаць усе каментары/ 34 /
Каб пакінуць каментар, калі ласка, актывуйце JavaScript у наладах свайго браўзеру