Сто чалавек не збаяліся выйсці на святкаванне Дня Волі ў горадзе над Дзвіной. «Народная ўлада» будзе судзіць усіх з іх, хто не збаяўся ўзняць сцягі.
Сяргея Каваленку, Ігара Базарава, Валерыя Аляксандрава, Леаніда Аўтухова і Аляксандра Кузьняцова будуць судзіць за ўдзел у несанкцыянаваных акцыях.
Удзельнікаў некалькіх акцый, якія ўчора цягам дня прайшлі ў Віцебску, было значна болей, больш за сотню чалавек, але менавіта гэтыя пяцёра хлопцаў разгарнулі на вачох віцебскіх мінакоў бел‑чырвона‑белыя сьцягі, за што й былі затрыманыя міліцыяй.
Мінулую ноч у ізалятары часовага ўтрыманьня мусілі правесьці сябра КХП‑ БНФ Сяргей Каваленка і ягоны аднадумца Ігар Базараў. Разам з Валерам Аляксандравым гэтыя хлопцы разгарнулі нацыянальныя сьцягі на плошчы Свабоды. Спадара Аляксандрава міліцыянты на ноч не затрымлівалі, бо ён мае інваліднасьць.
З ізалятару часовага ўтрыманьня ў Кастрычніцкі раённы суд прывязуць таксама старшыню раённай суполкі Партыі БНФ з Гарадка Леаніда Аўтухова, які разгарнуў нацыянальны сьцяг ля мэмарыяльнай дошкі Васіля Быкава, куды грамадзкія актывісты прыйшлі ўчора ўвечары, каб ускласьці кветкі.
Віцебскія грамадзкія актывісты і праваабаронцы зьбіраюцца сёньня папрысутнічаць на ўсіх судовых працэсах супраць апазыцыянэраў, каб выказаць зь імі салідарнасьць.
