Сайт КХП БНФ паведаміў, што 26 сакавіка не стала сябра партыі Міколы Яўмененкі з вёскі Чудзеніцы на Лагойшчыне. Яму было 85 гадоў.
«Спадар Мікола нёс беларускую праўду сваім землякам, быў аўтарытэтам для людзей. Ён заўсёды прыязджаў у Менск і ў светлыя дні патрыятычных святаў і сходаў, і ў трывожны час, калі Айчына была ў небяспецы. Свае думкі, мары і перажыванні ён увасабляў у вершах, беларускіх па форме і змесце», — згадваюць яго паплечнікі.
Рэдакцыя «Нашай Нівы» таксама згадвае гэтае імя з цеплынёй: спадар Мікола амаль у кожны свой прыезд у Мінск прывозіў яблыкі са свайго саду для нас, свае вершы.
Светлая памяць!
