2 красавіка ў Брэсце абвясцілі прысуд па справе 19-гадовага Валянціна Янучэні, які ў жніўні мінулага года разграміў сякерай «Еўраопт» і пагражаў міліцыянеру, паведамляе Tut.by.
Суд прызнаў маладога чалавека вінаватым у хуліганстве, наўмысным знішчэнні і пашкоджанні маёмасці, а таксама пагрозе гвалту ў дачыненні да супрацоўніка міліцыі, паведаміла TUT.BY старшы памочнік пракурора Брэста Ірына Рубанава, якая падтрымлівала абвінавачванне па справе.
Суд улічыў, што абвінавачаны добраахвотна кампенсаваў нанесены ўрон, і прызначыў яму 6 гадоў пазбаўлення волі ў калоніі ўзмоцненага рэжыму.
Прысуд не ўступіў у законную сілу і можа быць абскарджаны.
Здарэнне адбылося 17 жніўня мінулага года. Валянцін Янучэня сякерай разнёс шклопакеты дзвярэй «Еўраопта» і ўвайшоў у зачыненую краму. Там стаў разбураць усё, што траплялася на вочы.
Дзяржаўны абвінаваўца на другім пасяджэнні зачытала доўгі спіс пашкоджанай маёмасці прыватных кампаній, якія арандавалі ў «Еўраопце» гандлёвыя плошчы: мабільныя тэлефоны, вітрыны, тэлевізары, шкляныя дзверы, прадукты харчавання, маразільнік, бутэлькі з квасам, аўтамабіль Renault Sandero, які выстаўляўся ля ўваходу ў гандлёвы цэнтр… Агульная сума нанесенай шкоды — 32,3 тысячы рублёў. З іх прыкладна палова — шкода, нанесеная МТС.
Міліцыю на дэбашыра выклікаў супрацоўнік службы бяспекі гандлёвага цэнтра. Нарад паспрабаваў супакоіць абвінавачанага і затрымаць. Валянцін адмаўляўся выконваць іх патрабаванні і не дапускаў да сябе. Затым і зусім стаў пагражаць міліцыянту, які наблізіўся да яго для затрымання, і замахнуўся сякерай.
— Я стаў распытваць хлопца, што здарылася, — распавёў у судзе пацярпелы міліцыянт, — можа, яго дзяўчына кінула? Ён сказаў, што ніхто яго не кідаў, што ён страціў сэнс жыцця. Я падышоў да яго, каб затрымаць, але ён стаў у стойку. Мы з напарнікам спыніліся, зноў пачалі яго прасіць пакласці сякеру. Казалі: «У цябе ж ёсць маці, бацька, падумай пра іх, пакладзі сякеру, пакуль нічога горшага не зрабіў». А калі б ён выбег на вуліцу з гэтай сякерай… Там жа ёсць установы, кафэ, запраўка.
Супакоіўся абвінавачваны толькі пасля двух папераджальных стрэлаў у паветра.
Як паказана ў матэрыялах справы, хлопец быў цвярозы і ў здаровым розуме — усведамляў супрацьпраўны характар сваіх дзеянняў і мог кіраваць імі.
Цяпер чытаюць
Радыёвядучы расказаў пра ўнутраную кухню АНТ — і пра тое, як ператварыўся ў палітвязня1
Каментары